Shtylla e tretë e programit qeverisës “Rama 4”, e titulluar Mirëqenia për të gjithë, fokusohet gjerësisht te arsimi, duke vendosur një sërë objektivash afatmesëm e afatgjatë që synojnë modernizimin e sistemit dhe rritjen e cilësisë.
Në dokument parashikohet që deri në vitin 2029 paga e mësuesve të arrijë nivelin 1,250 euro, ndërsa vendi do të përfitojë 200 shkolla të reja dhe 1,000 laboratorë inteligjentë. Një tjetër pikë kyçe është digjitalizimi i arsimit dhe testimeve, përfshirë kurrikula të reja që integrojnë inteligjencën artificiale.
Programi parashikon ngritjen e një agjencie të specializuar, të certifikuar sipas standardeve ndërkombëtare, për të garantuar njohjen automatike të diplomave.
Po ashtu, do të zbatohet një program ushqimi në çdo bashki qendër qarku, si dhe shërbime pas-shkollore (after school).
Një tjetër risi është ngritja e një shoqërie publike për transportin shkollor, që do të ofrojë transport falas për nxënësit dhe mësuesit që jetojnë larg institucioneve arsimore.
Në fushën e arsimit profesional synohet dyfishimi i numrit të nxënësve, me investime prej 60 milionë eurosh për shkolla profesionale dhe laboratorë teknikë. Qeveria synon që deri në vitin 2030, 35% e nxënësve të ndjekin arsimin profesional, duke garantuar konvikte me standarde europiane.
Gjithashtu, parashikohet përfshirja e diasporës akademike në hartimin e politikave, mësimdhënie dhe kërkim shkencor, me synim sjelljen e eksperiencave më të mira ndërkombëtare dhe krijimin e urave të bashkëpunimit. /skyweb.al
