Kryeministri Edi Rama ka njoftuar nisjen e një transformimi të gjerë teknologjik në fushën e sigurisë, duke deklaruar se e gjithë Shqipëria do të mbulohet në çdo cep me kamera inteligjente.
Marrëveshja më e rëndësishme në këtë drejtim, sipas tij, është finalizuar me Emiratet e Bashkuara Arabe dhe pritet të sjellë standarde sigurie të ngjashme me ato amerikane.
“Do të kemi qytete inteligjente, mbulim me kamera tërësisht nga rrugët, tek shkollat, brenda shkollës e klasës, për të na dhënë një nivel sigurie të lartë. Kjo do të thotë evidentim në kohë reale i çdo shkeljeje të ligjit,” tha Rama.
Ai theksoi se edhe brenda shkollave do të vendoset një sistem video-regjistrimi, i cili do të jetë i aksesueshëm për drejtuesit e shkollave, prindërit dhe Policinë e Shtetit. “Siguria më e lartë në shkolla do të garantohet përmes këtij sistemi, ku prindërit do të kenë mundësi të ndjekin veprimtaritë brenda klasave,” shtoi kryeministri.
Përveç kësaj, qeveria synon të rrisë sigurinë në territor, plazhe, lumenj dhe pyje përmes survejimit ajror me dronë dhe satelitë. Rama theksoi se objektivi është që çdo cënim i territorit të identifikohet në kohë reale, duke e kaluar nga sistemi aktual i kontrollit periodik në një sistem të vazhdueshëm monitorimi. /skyweb.al
