Qeveria daneze ka vendosur të armatoset me sisteme goditjeje me rreze të gjatë, me qëllim forcimin e mbrojtjes kombëtare dhe kontributin në sigurinë kolektive të NATO-s. Vendimi u mor pas rekomandimit të Shefit të Mbrojtjes, gjeneralit Michael Hyldgaard.
Ministri i Mbrojtjes, Troels Lund Poulsen, tha se tani ushtria do të shqyrtojë mënyrat se si do të blihen dhe integrohen këto armë të reja precize.
Ky vendim pason projektin e shpallur më herët këtë muaj për të investuar rreth 9.2 miliardë dollarë në tetë sisteme të mbrojtjes ajrore me rreze të mesme dhe të gjatë, sipas DefenseNews.
Sipas autoriteteve daneze, përvoja e luftës në Ukrainë ka treguar se vetëm mbrojtja me sisteme kundër ajrore nuk është e mjaftueshme. Rusia përdor sulme masive me raketa dhe dronë për të mbingarkuar mbrojtjen ajrore.
Zgjidhja, sipas tyre, është neutralizimi i bazave dhe mjeteve të armikut përpara se raketat të lëshohen.
“Me këtë hap, Danimarka do të ketë jo vetëm mbrojtje më të fortë nga ajri, por edhe aftësi për të goditur kërcënimet larg territorit të saj,” tha ministri Poulsen.
Ministri i Jashtëm Lars Løkke Rasmussen theksoi se ky hap është në linjë me kërkesën e NATO-s dhe se synon parandalimin, jo përdorimin e menjëhershëm.
Ai shtoi se Danimarka do të ndihmojë ambicien e Europës për të arritur aftësi të plota mbrojtëse deri në vitin 2030.
Organizata e Blerjeve dhe Logjistikës së Mbrojtjes do të analizojë tregun për të zgjedhur opsionin më të përshtatshëm. Në listë janë:
Raketa Tomahawk – që mund të instalohen në fregatat e flotës daneze;
JASSM-ER – raketa me rreze të gjatë për avionët F-35;
Projekte të reja europiane, si raketa “Crossbow” me rreze mbi 800 km e kompanisë MBDA, që mund të hyjë në prodhim në 2026;
Programi i përbashkët europian ELSA për zhvillimin e armëve me rreze mbi 2,000 km, ku marrin pjesë Gjermania dhe Britania e Madhe.
Ky vendim vendos Danimarkën mes vendeve që po përgatiten për një mbrojtje të shtresëzuar: jo vetëm të mbrohen nga sulmet ajrore, por edhe të neutralizojnë kërcënimet që ende pa u nisur. /skyweb.al
