Aviacioni civil në Shqipëri po përjeton një zgjerim të pandërprerë, duke u shndërruar në një nga motorët kryesorë të zhvillimit të turizmit dhe të ekonomisë. Rritja e numrit të pasagjerëve po e kthen transportin ajror në hyrjen kryesore të vendit, duke rivalizuar dhe tejkaluar fqinjët në rajon.
Sipas parashikimeve të Autoritetit të Aviacionit Civil Ndërkombëtar (ICAO), deri në vitin 2040 fluksi i udhëtarëve që do të kalojnë nëpër aeroportet shqiptare do të arrijë në mbi 21.6 milionë pasagjerë, një trefishim i konsiderueshëm krahasuar me shifrat aktuale.
Zëvendëskryeministrja dhe ministrja e Infrastrukturës dhe Energjisë, Belinda Balluku, theksoi se rrjeti i aeroporteve ndërkombëtare po e pozicionon Shqipërinë në një nivel të ri në hartën e transportit ajror. “Me funksionimin e Tiranës, Vlorës, Kukësit dhe së shpejti Gjirokastrës, vendi ynë po kthehet në një nyje rajonale të turizmit dhe lidhjeve ajrore, duke tërhequr gjithnjë e më shumë vizitorë ndërkombëtarë,” deklaroi ajo.
Vetëm gjatë periudhës janar–gusht 2025, Aeroporti Ndërkombëtar i Tiranës shënoi mbi 7.8 milionë pasagjerë, me një rritje prej 9% krahasuar me një vit më parë. Në këtë periudhë u regjistruan 42,462 fluturime, 2% më shumë se në vitin 2024, ndërsa kryeqyteti u lidh me 137 destinacione ndërkombëtare, duke zgjeruar ndjeshëm hartën e fluturimeve direkte.
Kjo rritje e fuqishme e ka vendosur Tiranën në krye të listës së aeroporteve të Ballkanit Perëndimor, duke tejkaluar për herë të parë qendrat tradicionale të fluturimeve si Prishtina, Beogradi, Shkupi, Podgorica apo Sarajeva. Për pasojë, Tirana nuk është vetëm porta kryesore e turizmit për Shqipërinë, por po kthehet edhe në një alternativë të preferuar për udhëtarët e rajonit që kërkojnë lidhje më të shpejta me Europën dhe me destinacionet ndërkontinentale.
Kombinimi i projekteve të reja aeroportuale me flukset në rritje e vendos Shqipërinë përballë një perspektive të re zhvillimore, ku turizmi dhe aviacioni civil shihen si binarë të së njëjtës strategji kombëtare. /skyweb.al
