Kryeministri Edi Rama ka shpallur një nga objektivat më ambiciozë të qeverisë në fushën e inovacionit dhe teknologjisë: transformimin e Shqipërisë në një ekonomi ku të gjitha transaksionet financiare kryhen në mënyrë digjitale, duke eliminuar përdorimin e parasë fizike brenda fundit të kësaj dekade.
Në përfundim të një takimi maratonë me përfaqësues të sektorit të teknologjisë dhe inovacionit, Rama deklaroi se një “sforco e madhe” do të jetë e nevojshme për të arritur këtë qëllim, por teknologjia ekzistuese dhe gatishmëria institucionale e bëjnë atë plotësisht të realizueshëm.
“Duhet ta kalojmë në një nivel tjetër agjencinë e inovacionit. Ajo që mbeti pa u thënë është që ne kemi dhe një ambicie tjetër që deri në fund të dekadës Shqipëria të jetë ‘cashless’, pra transaksionet financiare të jenë digjitale.
Na duhet goxha sensibilizim. Teknologjia nuk mungon. Është plotësisht e realizueshme dhe do çlirojë vendin nga një barrë pluhuri dhe ferrash në jetën e përditshme,” theksoi ai.
Rama u bëri thirrje aktorëve të përfshirë që të përgatisin një dokument strategjik sa më të hapur, krijues dhe të lirë nga kufizimet tradicionale, duke vënë theksin tek fleksibiliteti dhe imagjinata.
Deklarata e kryeministrit vjen në një kohë kur vendi përballet me sfida të shumta në digjitalizimin e shërbimeve publike dhe bankarizimin e plotë të popullsisë, ndërsa ekonomia informale mbetet ende një pengesë serioze në këtë drejtim. Megjithatë, qeveria duket e vendosur të çojë përpara tranzicionin drejt një sistemi financiar modern dhe të automatizuar./skyweb.al
