Rënia e vazhdueshme e kursit të këmbimit, me forcimin e lekut ndaj euros dhe valutave të tjera, po shihet gjithnjë e më shumë si një nga faktorët kryesorë që po godet konkurrueshmërinë e eksporteve shqiptare.
Sipas të dhënave të Bankës së Shqipërisë të konsultuara nga skyweb.al, gjatë vitit 2023 u eksportuan rreth 430 miliardë lekë mallra.
Në vitin 2024 vlera e eksporteve ra në afërsisht 369 miliardë lekë, ndërsa në vitin 2025 eksportet zbritën më tej në rreth 346 miliardë lekë.
Kjo do të thotë se në vetëm dy vite eksportet kanë rënë me rreth 84 miliardë lekë, ose afërsisht 19–20% krahasuar me vitin 2023, një tkurrje e ndjeshme për një ekonomi që mbështetet në prodhimin për tregjet e huaja.
Forcimi i lekut e bën më të shtrenjtë produktin shqiptar në tregjet ndërkombëtare, duke ulur marzhet e fitimit për eksportuesit dhe duke rritur presionin mbi sektorë kyç si tekstilet, materialet e ndërtimit dhe industrinë përpunuese.
Shumë kompani janë detyruar të rishikojnë kontratat, të ulin prodhimin ose të shtyjnë investimet, për shkak të uljes së të ardhurave në valutë.
Bizneset paralajmërojnë se nëse trendi i kursit të këmbimit vazhdon në të njëjtën drejtim, efekti do të ndihet jo vetëm në eksportet, por edhe në punësim dhe në ritmin e rritjes ekonomike, duke e kthyer kursin e fortë të lekut në një nga sfidat kryesore strukturore për sektorin prodhues. /skyweb.al
