Porti i Durrësit është bërë sot destinacioni i një prej superjahteve më të mëdha dhe më mahnitëse në botë, “Yas”. Me një gjatësi prej 141 metrash dhe një dizajn futurist që kujton formën elegante të një delfini, “Yas” po tërheq vëmendjen e vizitorëve dhe banorëve të qytetit bregdetar.
Ky jaht unik nuk nisi jetën si anije luksoze. Fillimisht ishte një fregatë ushtarake e marinës holandeze, por falë një transformimi spektakolar nga kantieri ADM Shipyards në Abu Dhabi, “Yas” është shndërruar në simbol të luksit detar dhe inovacionit inxhinierik.
Struktura e tij përfshin sipërfaqe të gjera xhami, hapësira të brendshme me dizajn modern dhe mundësi akomodimi për mbi 60 persona, ndërsa mbi 50 anëtarë ekuipazhi kujdesen për çdo detaj të udhëtimit. I pajisur me dy motorë MTU, “Yas” arrin shpejtësi deri në 26 nyje – një performancë e lartë për përmasat e tij kolosale. /Skyweb.al
