Ekonomia amerikane po mbështetet gjithnjë e më shumë te shpenzimet e shtresës më të pasur të popullsisë, duke krijuar një hendek të fortë mes familjeve me të ardhura të larta dhe pjesës tjetër të konsumatorëve.
Sipas një analize të Moody’s Analytics, 10% e familjeve më të pasura në SHBA, me të ardhura rreth 250 mijë dollarë ose më shumë në vit, realizuan 49.2% të të gjitha shpenzimeve konsumatore në tremujorin e dytë të vitit 2025.
Ky është niveli më i lartë që prej nisjes së të dhënave në vitin 1989, kur e njëjta kategori përfaqësonte vetëm rreth 36% të konsumit.
Ekonomisti kryesor i Moody’s, Mark Zandi, vlerëson se vetëm shpenzimet e kësaj shtrese përbëjnë afro një të tretën e Prodhimit të Brendshëm Bruto të SHBA-së.
Rritja e pasurisë financiare ka luajtur një rol kyç. Indeksi S&P 500 është rritur me rreth 261% gjatë një dekade, ndërsa 1% më i pasur i amerikanëve zotëron rreth gjysmën e vlerës së tregut të aksioneve.
Në të njëjtën kohë, 80% e popullsisë me të ardhura më të ulëta përfaqëson vetëm rreth 37% të konsumit, ndërsa shumë familje të shtresës së mesme po reduktojnë shpenzimet dhe po mbështeten gjithnjë e më shumë te ofertat dhe skemat “blej tani, paguaj më vonë”.
Sipas Zandit, kjo përqendrim e bën ekonominë më të brishtë, pasi një rënie e bursave, çmimeve të pronave apo e besimit të familjeve më të pasura mund të godasë menjëherë konsumin.
Në këtë mënyrë, pas shifrave të forta të PBB-së amerikane fshihet një realitet gjithnjë e më i pabarabartë: ekonomia vazhdon të rritet, por gjithnjë e më shumë falë portofolit të vetëm 10% të popullsisë.
