Autostrada Tiranë–Durrës do të bllokohet përkohësisht gjatë tre netëve të para të shtatorit, për shkak të punimeve që po kryhen në kuadër të zgjerimit të superstradës.
ARRSH njofton se më 1, 2 dhe 3 shtator 2026, nga ora 23:00 deri në 05:00, do të bllokohen korsitë e lëvizjes në të dyja drejtimet Tiranë–Durrës dhe Durrës–Tiranë, në zonën e Kasharit.
Kufizimi bëhet për montimin e trarëve metalikë në hapësirën qendrore të mbikalimit të ri të Kasharit.
Mjetet që udhëtojnë nga Tirana drejt Durrësit do të devijohen përmes rampës provizore drejt Rinasit dhe më pas në rrugën dytësore, për t’u rikthyer sërish në autostradë.
Kamionët dhe mjetet e tjera të rënda do të devijohen që në nyjën “Casa Italia”, duke vijuar përgjatë rrugës dytësore.
Në drejtimin Durrës–Tiranë, automjetet do të devijohen përmes mbikalimit Kashar–Thumanë dhe do të vijojnë në rrugën dytësore deri pas mbikalimit të Kasharit.
Ndërkohë, mjetet me destinacion Rinasin, Shkodrën apo Kosovën do të orientohen që në mbikalimin e autostradës Kashar–Thumanë.
ARRSH u kërkon drejtuesve të mjeteve të planifikojnë paraprakisht udhëtimet dhe, sa të jetë e mundur, të shmangin këtë segment gjatë orareve të punimeve.
