Prej shpërthimit të skandalit të AKSHI-t, Mirlinda Karçanaj nuk është shprehur asnjëherë publikisht për akuzat që rëndojnë mbi institucionin që ajo drejtonte.
Kjo heshtje vjen në një moment kur shërbimet e e-Albania, një platformë e ndërtuar dhe menaxhuar nga AKSHI në bashkëpunim me kompani që sot janë pjesë e hetimit penal, vijojnë të mos funksionojnë prej disa ditësh.
Situata është përkeqësuar më tej, pasi prej tre ditësh nuk aksesohet as faqja zyrtare e Komisionit të Prokurimit Publik, një institucion që sipas hetimeve dyshohet se ka vepruar në linjë me interesat e grupit të AKSHI-t.
Ndërkohë që publikisht nuk ka asnjë reagim apo sqarim institucional, dosja e SPAK përmban prova filmike që hedhin dritë mbi natyrën reale të marrëdhënieve mes Mirlinda Karçanajt, Ergys Agasit dhe Ermal Beqirit.
Karçanaj ka deklaruar se i ka takuar Agasin dhe Beqirin për çështje private dhe jo për tendera apo procedura prokurimi.
Megjithatë, pamjet e sekuestruara nga organi i akuzës tregojnë një tjetër realitet.
Në videoregjistrimet e realizuara me kamerë të fshehtë, të përfshira në dosjen hetimore, dëgjohen biseda që lidhen drejtpërdrejt me projekte, vlera financiare, procedura dhe ndërhyrje institucionale.
Në një nga komunikimet, përmendet hapur se “projekti bën 2 milion, ne do ta bëjmë 4”, ndërsa në të tjera flitet për “shkresa zyrtare”, “institucione”, “testime” dhe bashkëpunime teknike, përfshirë referenca ndaj partnerëve izraelitë.
Këto elementë, sipas SPAK, nuk përputhen me pretendimin për takime private apo rastësore.
Në vlerësimin e prokurorit të çështjes, Bledar Maksuti, të dhënat e përftuara nga pamjet filmike të gjetura në pajisjen e sekuestruar tregojnë qartë se personat në fjalë janë të lidhur me njëri-tjetrin dhe diskutojnë për procedura që lidhen me prokurime publike.
Referencat për vlerën e projekteve dhe kriteret e përzgjedhjes interpretohen si sinjale për përcaktimin paraprak të fondit limit dhe kushteve të tenderave.
SPAK thekson se, pavarësisht deklarimeve të Karçanajt për njohje miqësore dhe takime private, faktet e administruara provojnë se ajo ishte në dijeni të plotë të lidhjeve mes Agasit dhe Beqirit dhe të rolit të tyre në skemën e ndërtuar rreth AKSHI-t. Takimi në ambientet e zyrës së Agasit, i justifikuar si një konsultim teknik për partneritete, përforcon sipas hetuesve bindjen se bëhej fjalë për koordinim veprimesh dhe jo për kontakte rastësore.
Në këtë kontekst, heshtja publike e Mirlinda Karçanajt dhe paraliza e platformave digjitale shtetërore shtojnë dyshimet mbi përmasat reale të aferës dhe ndikimin e saj në funksionimin e institucioneve.
Ndërsa hetimet vijojnë, pamjet filmike dhe zbardhjet e dosjes po shfaqen si një nga provat kyçe që rrëzojnë versionin e takimeve “private” dhe e vendosin skandalin e AKSHI-t në një tjetër nivel përgjegjësie institucionale.
