Ministrat e Mbrojtjes nga dhjetë vende evropiane, përfshirë edhe Ukrainën, do të zhvillojnë një takim urgjent të premten për të diskutuar ndërtimin e një “muri me dronë”, si përgjigje e rritjes së rrezikut nga dronët dhe pas një sulmi të dyshuar hibrid ndaj katër aeroporteve në Danimarkë, i dyti i këtij lloji brenda disa ditësh.
Presidentja e Komisionit Evropian, Ursula von der Leyen, e ka quajtur këtë iniciativë “themelet e një mbrojtjeje të besueshme”, ndërsa kërkohet një përgjigje e koordinuar ndaj kërcënimeve ajrore që vijnë nga teknologjitë më të reja.
Komisioni Evropian ka dhënë sinjale se ndërtimi i një muri me dronë mund të financohet përmes skemës së huave për Sigurinë Evropiane, me një fond total prej 150 miliardë eurosh.
Zëdhënësi i Komisionit për çështjet e mbrojtjes, Thomas Regnier, tha se takimi i së premtes do të jetë një mundësi për të diskutuar kapacitetet ekzistuese dhe sfidat përpara.
“Detyra jonë e parë është të zbulojmë dronët që afrohen, kjo nuk është aspak e lehtë. Nuk kemi të bëjmë me avionë të mëdhenj apo mjete të zakonshme ajrore, por me teknologji të sofistikuara që duhen zbuluar në kohë. Hapi i dytë do të jetë vendosja e mënyrës së reagimit ndaj tyre”.
Incidentet në Danimarkë nisën mbrëmjen e së mërkurës, pak para orës 22:00 dhe zgjatën deri rreth orës 01:00 të mëngjesit të së enjtes. Aeroporti i Aalborgut, që shërben edhe si bazë ushtarake, u detyrua të pezullojë fluturimet për disa orë, ndërsa Aeroporti i Billundit, i dyti më i madh në vend, mbylli hapësirën ajrore për gati një orë.
Aeroportet në Esbjerg, Sonderborg dhe Skrydstrup, ku ndodhen edhe avionë luftarakë të ushtrisë daneze, gjithashtu u prekën nga incidenti.
Vetëm pak ditë më parë, të hënën në mbrëmje, Aeroporti i Kopenhagënit u detyrua të mbyllej për shkak të pranisë së tre dronëve. /Skyweb.al
