Vala e fluturimeve misterioze të dronëve mbi hapësirën ajrore të Europës ka përfshirë së fundmi edhe Francën. Ushtria franceze ka konfirmuar praninë e disa dronëve të paidentifikuar mbi bazën ushtarake të Mormelonit, në verilindje të vendit. Kjo bazë ka shërbyer më herët për stërvitjen e ushtarëve ukrainas.
Edhe pse nuk është raportuar asnjë dëm, autoritetet franceze kanë nisur hetimet për të përcaktuar origjinën dhe qëllimin e këtyre fluturimeve të paligjshme në afërsi të zonave ushtarake.
Ngjarje të ngjashme janë shënuar ditët e fundit edhe në Danimarkë. Qytetarë në Aalborg filmuan disa dronë që fluturonin gjatë natës, duke shkaktuar pezullimin e përkohshëm të fluturimeve në aeroportin e qytetit – për herë të dytë brenda 48 orëve. Dronë janë raportuar edhe në Kopenhagen dhe qytete të tjera, pranë aeroporteve dhe zonave të ndjeshme.
Edhe pse nuk ka prova konkrete për përfshirjen e Rusisë, autoritetet daneze kanë ngritur shqetësime për një “sulm hibrid” të mundshëm. Kryeministrja Mette Frederiksen deklaroi se do t’i kërkojë NATO-s ndihmë për krijimin e një sistemi mbrojtës kundër dronëve.
Frika për provokime të qëllimshme nga Rusia është rritur ndjeshëm pas incidentit të 9 shtatorit, kur mbi 20 dronë ushtarakë të dyshuar rusë kaluan nga Ukraina në hapësirën ajrore të Polonisë, duke rritur tensionet mes Moskës dhe aleancës së NATO-s. /Skyweb.al
