Strukturat akomoduese në Shqipëri kanë regjistruar një rritje të ndjeshme të numrit të vizitorëve dhe net qëndrimeve gjatë muajit Prill 2025, krahasuar me të njëjtën periudhë të vitit të kaluar, sipas të dhënave zyrtare të publikuara nga INSTAT.
Numri total i vizitorëve u rrit me 14,7 %, me një rritje të veçantë prej 15,3 % të vizitorëve jo-rezidentë. Në të njëjtën kohë, net qëndrimet në strukturat akomoduese u rritën me 21,3 %, një sinjal pozitiv për sektorin e turizmit dhe industrinë pritëse. Nga këto, net qëndrimet nga jo-rezidentët u rritën me 23,0 %, ndërsa ato nga vizitorët vendas me 17,2 %.
Rritja më e madhe e vizitorëve të huaj u regjistrua në zonat jo-bregdetare, me një rritje prej 8,5 %, duke treguar një interes në rritje për turizmin natyror dhe kulturor. Ndërkohë, hotelet dhe akomodimet e ngjashme regjistruan një rritje prej 15,5 % të vizitorëve jo-rezidentë.
Italia, Kosova dhe Gjermania vijojnë të jenë tregjet kryesore të turizmit hyrës, duke përfaqësuar përkatësisht 16 %, 14 % dhe 8 % të totalit të vizitorëve të huaj të akomoduar në vend. Pas tyre renditen Polonia me 7 % dhe Mbretëria e Bashkuar me 6 %, ndërsa 49 % e vizitorëve vijnë nga vende të tjera.
Për sa i përket shfrytëzimit të dhomave, në Prill 2025 kjo normë arriti në 22,4 %, një rritje e lehtë krahasuar me 22,1 %të regjistruar në Prill 2024.
Këto të dhëna konfirmojnë vazhdimësinë e trendit pozitiv në sektorin turistik shqiptar dhe zgjerimin e interesit për Shqipërinë si një destinacion gjithëvjetor, jo vetëm për turizmin bregdetar, por edhe për atraksionet e tjera kulturore dhe natyrore të vendit. /skyweb.al
