Rreth 23,396 fermerë në të gjithë vendin janë shpallur fitues dhe kanë përfituar financim nga Skema Kombëtare e Mbështetjes në Bujqësi për vitin 2025, sipas të dhënave nga Ministria e Bujqësisë.
Deri më tani janë disbursuar mbi 1.13 miliard lekë (rreth 11 milionë euro), ndërsa pagesat për përfituesit e tjerë janë në proces.
Skema përfshin mbështetje për blegtori, bletari, naftë për punime bujqësore, bimë mjekësore-aromatike, inpute bujqësore, fermat organike dhe certifikimin Global GAP.
Nga 69,917 aplikime të regjistruara në e-Albania, rreth 52,837 janë për skemën e naftës. Ndërkohë, për masat 1-7 janë përzgjedhur 7,272 fermerë.
Fondi total për këtë skemë është 3.2 miliardë lekë, me fokus të veçantë te Shoqëritë e Bashkëpunimit Bujqësor, të cilat mund të përfitojnë deri në 100% të mbështetjes.
Në vitin 2024, mbi 67 mijë fermerë përfituan nga skemat e subvencioneve, përfshirë 14,937 nga skema kombëtare dhe 52,195 nga skema e naftës. /Skyweb.al
