Zëvendëskryeministrja dhe ministrja e Energjisë dhe Infrastrukturës, Belinda Balluku, ka bërë të ditur se për shkak të kushteve të pafavorshme të motit, gjatë 24 orëve të fundit dy fluturime në ardhje, të planifikuara për datën 5 në orët e mbrëmjes, janë detyruar të devijojnë drejt Barit.
Balluku sqaron se fenomenet meteorologjike në zonën e Aeroportit Ndërkombëtar të Tiranës dhe në afërsi të tij e kanë bërë të pamundur uljen e sigurt të këtyre avionëve. Ajo theksoi se stafet e Albcontrol kanë qenë në komunikim të vazhdueshëm me pilotët dhe kanë përmbushur të gjitha kërkesat e tyre për të shmangur zonat e prekura nga moti i keq gjatë fazave të fluturimit.
Sipas zv.kryeministres, edhe gjatë ditës së sotme janë evidentuar fenomene meteorologjike të lokalizuara pranë aeroportit, çka mund të sjellë vonesa në disa fluturime. Balluku siguroi se Albcontrol po e monitoron situatën në mënyrë të vazhdueshme, me qëllim garantimin e sigurisë dhe ofrimin normal të shërbimeve të lundrimit ajror. /skyweb.al
