Në Greqi pritet të miratohet një projektligj i ri që parashikon mundësinë për të punuar deri në 13 orë në ditë, sipas deklaratës së ministres së Punës, Niki Kerameos. Kjo rregullore, që sipas saj është “në interes të punëmarrësve”, ka shkaktuar reagime të ashpra nga sindikatat, të cilat kanë shpallur grevë të përgjithshme. Rrugët dhe sheshet u mbushën me protestues që kundërshtojnë projketligjin në fjalë, nën moton “Raskapitja nuk është zhvillim”.
Krahas kësaj, në Greqi tashmë është në fuqi java me gjashtë ditë pune për disa sektorë, që nga korriku 2024. Dita e gjashtë paguhet me një shtesë prej 40% të pagës ditore.
Ministrja thekson se orët shtesë do të jenë “vullnetare”, por sindikatat dhe ekspertët e marrëdhënieve të punës paralajmërojnë për pasoja negative, presion ndaj punonjësve, ulje të produktivitetit dhe përkeqësim të ekuilibrit punë-jetë.
Në projektligj përfshihen edhe dispozita për ndarje më fleksibël të pushimeve, njoftime për orë shtesë nëpërmjet aplikacioneve, dhe gatishmëri për punë në bazë të “nevojave urgjente të firmës”.
Greqia ka ndër oraret më të gjata të punës në BE, me mbi 1880 orë në vit për punonjës, por mbetet ndër vendet me produktivitetin dhe fuqinë blerëse më të ulët. Sindikatat paralajmërojnë se vendi po lëviz në drejtimin e kundërt të pjesës tjetër të Europës, ku po kërkohet ulja e orëve të punës dhe java me katër ditë. /Skyweb.al
