Censi i Bujqësisë në Shqipëri pritet të zhvillohet në muajt shtator dhe tetor të vitit 2026, me një buxhet të parashikuar prej 920 milionë lekësh (rreth 9.2 milionë euro). Procesi do të zgjasë katër javë dhe do të jetë i pari i këtij lloji që prej vitit 2012.
Drejtuesja e INSTAT, Elsa Dhuli, bëri me dije në Komisionin e Ekonomisë se realizimi i këtij censusi varet nga miratimi i projektligjit përkatës në Kuvend. Ajo theksoi se procesi është në përputhje me rekomandimet e Organizatës Botërore të Bujqësisë dhe me rregulloren e BE-së për statistikat e integruara të fermave.
Aktualisht, strategjia për realizimin e censit është në fazën përfundimtare të miratimit, ndërsa INSTAT po bashkëpunon me Ministrinë e Bujqësisë përmes një memorandumi të nënshkruar bashkëpunimi.
Dhuli shtoi gjithashtu se personat që refuzojnë të japin informacion gjatë procesit, do të përballen me gjoba që variojnë nga 30 mijë deri në 100 mijë lekë.
Fillimisht i planifikuar për vitin 2022, Censi i Bujqësisë është shtyrë disa herë, duke pasur si afat më të fundit vitin 2026. /Skyweb.al
