OpenAI ka ndaluar përkohësisht përdorimin e aplikacionit të saj të inteligjencës artificiale, Sora, për të krijuar video të gjeneruara me imazhin e Martin Luther King Jr., pasi familja e tij kërkoi ndalimin e këtyre përmbajtjeve që konsiderohen “mosrespektuese”.
Sora është bërë virale në SHBA për aftësinë e saj për të krijuar video, por kjo ka çuar në shpërndarjen e skenave të falsifikuara që përfshijnë personazhe të famshëm tashmë të ndjerë dhe figura historike, shpesh në mënyra të çuditshme apo fyese.
Ndër videot më të përfolura ishin disa që ndryshonin fjalimin e famshëm “I Have a Dream” të King, përfshirë edhe një klip ku ai paraqitej duke bërë zëra raciste. Në disa raste të tjera, video të postuara në Sora dhe rrjete sociale tregonin figura që ngjanin me Dr. King dhe Malcolm X duke u përleshur.
Këto përmbajtje shkaktuan reagime të forta publike, përfshirë nga vajza e Dr. King, Bernice A. King, e cila u shpreh: “Ju lutem ndaloni.”
OpenAI njoftoi se do të ndalojë përkohësisht gjenerimin e videove me imazhin e Dr. King “ndërsa forcon masat mbrojtëse për figurat historike”. Megjithatë, ende lejon përdorimin e figurave të tjera të njohura si John F. Kennedy, Mbretëresha Elizabeth II dhe Stephen Haëking, gjë që ka ngjallur polemika.
Zelda Ëilliams, vajza e aktorit të ndjerë Robin Ëilliams, gjithashtu ka kërkuar që njerëzit të ndalojnë dërgimin e videove të krijuara me AI që përfshijnë babain e saj.
Ekspertja e etikës në AI, Olivia Gambelin, tha për BBC se ndalimi për Dr. King është “një hap pozitiv”, por shtoi se OpenAI duhet të kishte vendosur kufizime që në fillim, në vend që të përdorte një qasje “provë dhe gabim me zjarr”. /Skyweb.al
