WhatsApp po teston një veçori të re që synon të kufizojë numrin e mesazheve të padëshiruara, veçanërisht ato që vijnë nga llogari që dërgojnë shumë mesazhe pa marrë përgjigje. Ky sistem i ri ka për qëllim të frenojë aktivitetin e mashtruesve dhe të bizneseve që shpesh dërgojnë mesazhe të shumta pa lejen e përdoruesit.
Sipas ndryshimit të propozuar, çdo llogari, qofshin individë apo biznese do të ketë një kufi për numrin e mesazheve të njëanshme që mund të dërgojë. Ky kufi vlen vetëm për mesazhet që mbeten të palexuara ose që nuk marrin përgjigje. Nëse marrësi i mesazhit përgjigjet, atëherë ato biseda nuk do të llogariten më në kuotën mujore. Në rastet kur një llogari i afrohet këtij limiti, WhatsApp do të shfaqë një paralajmërim për përdoruesin.
Megjithatë, kompania siguron se kjo masë nuk pritet të ndikojë tek përdoruesit e zakonshëm. Masa synon kryesisht të parandalojë mesazhet e padëshiruara dhe ndërhyrjet nga llogari që nuk respektojnë privatësinë e të tjerëve. Testimi i këtij funksioni do të fillojë në disa shtete gjatë javëve të ardhshme, me një fokus të veçantë ndaj bizneseve dhe mashtruesve të mundshëm.
Në përpjekjet e vazhdueshme për të rritur sigurinë dhe për të luftuar mashtrimet në platformë, Meta ka ndërmarrë disa hapa konkretë. Vitin e kaluar, përdoruesve iu dha mundësia të çabonoheshin nga mesazhet promovuese, ndërsa në gusht të këtij viti, u prezantua një veçori që njofton përdoruesit kur shtohen në një grup nga një person jashtë listës së kontakteve.
Këto masa duken të domosdoshme, sidomos duke pasur parasysh se vetëm në gjysmën e parë të vitit 2025, WhatsApp ka mbyllur mbi 6.8 milionë llogari të lidhura me aktivitetet e mashtrimit. /Skyweb.al
