Prokuroria e Posaçme kundër Korrupsionit dhe Krimit të Organizuar ka konfirmuar se ka regjistruar një procedim penal lidhur me dyshimet për abuzime me fondet e programit IPARD II, që financohet nga Bashkimi Europian për mbështetjen e bujqësisë dhe zhvillimit rural në Shqipëri.
Në përgjigje të pyetjeve të mediave, SPAK thekson se çështja ndodhet në fazën e hetimeve paraprake, ndërsa për momentin nuk mund të japë detaje të tjera.
“Prokuroria e Posaçme kundër Korrupsionit dhe Krimit të Organizuar ka regjistruar procedim penal dhe çështja është në fazën e hetimeve paraprake. Për shkak të ruajtjes së sekretit hetimor, nuk mund të bëjë publike informacione të mëtejshme”, thuhet në njoftimin zyrtar.
SPAK nuk ka bërë të ditur as datën e regjistrimit të procedimit penal dhe as nëse ka emra konkretë të përfshirë në këtë hetim, duke theksuar se sekreti hetimor mbetet në fuqi deri në përfundimin e verifikimeve.
Programi IPARD II është një nga instrumentet kryesore të Bashkimit Europian për mbështetjen e sektorit bujqësor në Shqipëri, me qëllim nxitjen e investimeve dhe rritjen e standardeve të prodhimit, por është përmendur disa herë në raportime mediatike për dyshime mbi mënyrën e shpërndarjes së fondeve.
