Në pamje të parë, duket e pabesueshme: një industri që humbet konsumatorë, por fiton më shumë para. Kjo është historia e industrisë së duhanit sot.
Sipas analizës së The Economist, nëse një investitor do të kishte investuar 100 dollarë në kompanitë amerikane të duhanit në fillim të vitit 2024, do të kishte fituar 165 dollarë deri në fund të vitit,më shumë se ai që do të kishte investuar në tregun e teknologjisë (NASDAQ), ku fitimi do të ishte 154 dollarë.
Kjo rritje lidhet me një fenomen ekonomik të çuditshëm: fitimet e kompanive të cigareve po rriten, edhe pse numri i duhanpirësve po bie ndjeshëm.
Në SHBA, marzhi operativ për një cigare të shitur është rritur nga 50% në 60%, dhe për vitin aktual kompanitë e duhanit dhe purove pritet të përfitojnë 22 miliardë dollarë fitim operativ.
Në dekadën e fundit, numri i të rriturve që pijnë duhan është ulur me rreth 20 milionë, ndërsa shitjet e cigareve kanë rënë me më shumë se një të tretën.
Megjithatë, industria po fiton më shumë se kurrë.
Sekreti qëndron tek elasticiteti i çmimeve, pra mënyra si kompanitë përshtaten me uljen e konsumit duke rritur çmimet më shpejt se bie kërkesa.
Ndryshe nga industrive të tjera që falimentojnë kur humbin klientë, siç ndodhi me Blockbuster apo gazetat lokale, kompanitë e duhanit e kompensojnë rënien e konsumit me rritjen e fitimeve për njësi.
Në thelb, edhe kur njerëzit lënë duhanin, prodhuesit e cigareve fitojnë më shumë – një nga paradokset më të habitshme të ekonomisë moderne. /skyweb.al
