Shqipëria po përgatitet të hapë një ankand të ri për energjinë e rinovueshme në tremujorin e tretë të vitit 2026, në një kohë kur qeveria po zhvendos fokusin drejt forcimit të rrjetit të transmetimit dhe lidhjeve ndërkombëtare.
Plani u bë i ditur nga ministri i Infrastrukturës dhe Energjisë, Enea Karakaçi, gjatë një takimi me investitorë të huaj, ku theksoi se zhvillimet gjeopolitike e kanë kthyer sektorin energjetik në një nga më të ekspozuarit ndaj krizave globale.
Sipas tij, situata kërkon reagim të shpejtë dhe koordinim më të fortë për të garantuar sigurinë energjetike, ndërsa reformat e ndërmarra synojnë jo vetëm përafrimin me Bashkimin Europian, por edhe tërheqjen e investimeve të reja.
Që nga viti 2019, Shqipëria ka nisur diversifikimin e burimeve, duke ulur varësinë nga hidrocentralet. Aktualisht, rreth 10 për qind e prodhimit vendas vjen nga energjia diellore, ndërsa sektori po mbështetet gjithnjë e më shumë nga investimet private, përfshirë edhe projekte jashtë skemave mbështetëse.
Megjithatë, autoritetet pranojnë se sfida kryesore mbetet infrastruktura e transmetimit. Sipas ministrit, rritja e kapaciteteve prodhuese duhet të shoqërohet paralelisht me investime në rrjet, në mënyrë që energjia të shpërndahet dhe të shfrytëzohet në mënyrë efikase.
Në këtë kuadër, Shqipëria po përshpejton projektet për ndërlidhjet rajonale, përfshirë linjën me Maqedoninë e Veriut, rritjen e kapaciteteve me Greqinë dhe projektin strategjik të interkonjeksionit me Italinë.
