Apeli i GJKKO pritet të japë nesër vendimin për personat e arrestuar në kuadër të skandalit të AKSHI-t, pas operacionit të gjerë të zhvilluar disa javë më parë nga prokurori Bledar Maksuti, ku hetimet zbuluan abuzime serioze me tendera publikë, deri në akuza që lidhen edhe me pengmarrje.
Mësohet se SPAK ka dorëzuar prova të reja në Apel, duke kërkuar vijimin e masave të sigurisë për Mirlinda Karçanajn dhe të akuzuarit e tjerë.
Provat shtesë lidhen kryesisht me dëshminë e ish-zv.drejtorit të AKSHI-t, Daniel Shima, i cili ka dhënë deklarime të detajuara para prokurorëve mbi procedurat e tenderëve dhe vendimarrjet.
DOSJA/ Dalin bisedat “private” të Mirlinda Karçanajt me Ergys Agasin
Shima ka pranuar se të gjitha veprimet dhe vendimmarrjet e tij janë kryer nën udhëzimet direkte të Mirlinda Karçanajt. Në dëshminë e tij, ai ka pohuar se AKSHI funksiononte i dirigjuar nga Karçanaj dhe se çdo vendim merrej me miratimin e saj.
Këto deklarime konsiderohen si elementë të tjera kyç që rëndojnë pozitat juridike të Karçanajt, Ergys Agasit të konsideruar si “truri” i kësaj skeme dhe Ermal Beqirit.
Në dosjen hetimore përfshihet edhe një transaksion financiar i dyshuar, që lidhet me disa kompani të afërta me Ermal Beqirin, kompaninë Porsche Albania dhe familjarë të Mirlinda Karçanajt, për blerjen e një automjeti me vlerë rreth 39 mijë euro, i cili përfundimisht rezulton në përdorim të bashkëshortit të Karçanajt, Artan Babameto.
Po ashtu, flitet edhe për një kontratë qiraje apartamenti, e cila, ndonëse në emër të një kompanie të lidhur me Beqirin, lidhet drejtpërdrejt me interesat e Karçanajt.
Situata ngjan me skemën e ndjekur në skandalin e inceneratorëve, ku pas prishjes së aleancave, palët nisën të depozitonin materiale kundër njëra-tjetrës pranë prokurorisë dhe mediave.
Vendimi i Apelit pritet të jepet më 5 shkurt nga gjyqtari Florjan Kalaja. Në këtë seancë, drejtoresha e pezulluar e AKSHI-t, Mirlinda Karçanaj, kërkon heqjen e masës së sigurisë “arrest shtëpie”, ndërsa numri dy i Policisë së Tiranës, Erion Ismailaj, kërkon heqjen e masës së pezullimit nga detyra.
Sakaq, dy biznesmenët në kërkim, Ergys Agasi dhe Ermal Beqiri, nuk kanë paraqitur ankim në Apel, ndërkohë që masat e sigurisë ndaj tyre ende nuk janë ekzekutuar.
Të pandehurit akuzohen se kanë vepruar në formën e një grupi të strukturuar kriminal, duke abuzuar sistematikisht me tenderat e AKSHI-t. /skyweb.al
