Interesi i shqiptarëve për tregun e kriptovalutave është në rënie, sipas një raporti ndërkombëtar që mat përfshirjen e vendeve në aktivitetet me kripto. Shqipëria është renditur në vendin e 111-të nga 151 shtete të analizuara, duke shënuar një rënie krahasuar me vitin e kaluar, kur ndodhej në vendin e 109-të.
Sipas të dhënave, aktiviteti i përdoruesve shqiptarë në platformat e tregtimit të kriptomonedhave është zvogëluar në të gjitha format, si në platformat e këmbimit qendror, ato decentralizuar apo në transaksionet individuale. Kjo tregon se interesi për investime në asetet digjitale është zbehur ndjeshëm, ndoshta si pasojë e pasigurisë në treg, mungesës së rregullimit të qartë ligjor dhe humbjeve të mundshme që shumë përdorues kanë pësuar në vitet e fundit.
Në rajon, Shqipëria renditet ndër vendet me përfshirjen më të ulët në kriptovaluta. Maqedonia e Veriut është në vendin e 110-të, Mali i Zi në vendin e 104-të, ndërsa Serbia qëndron dukshëm më lart, në vendin e 67-të.
Në nivel global, India mban vendin e parë për përfshirjen më të madhe në tregun e kriptove, duke u bërë një nga qendrat kryesore të zhvillimit të këtij sektori.
Rënia e interesit për kriptovalutat në Shqipëri shihet si pjesë e një tendence më të gjerë rajonale, ku pas bumit fillestar të investimeve, përdoruesit janë bërë më të kujdesshëm për shkak të paqëndrueshmërisë së tregut dhe mungesës së mbrojtjes ligjore. /Skyweb.al
