Vendimi i fundit i Bordit të Transparencës për uljen e çmimeve të karburanteve ka sjellë reagimin e menjëhershëm të kompanive importuese, të cilat paralajmërojnë pasoja të forta në furnizimin e tregut.
Pas vendimit të datës 26 mars 2026, çmimi me pakicë i naftës u ul në 203 lekë për litër nga 214 lekë, ndërsa benzina në 175 lekë nga 199 lekë. Në të njëjtën kohë, çmimet me shumicë u fiksuan në 191 lekë për litër për naftën dhe 163 lekë për litër për benzinën.
Në reagimin e tyre zyrtar drejtuar Ministrisë së Financave dhe Ekonomisë dhe Ministrisë së Infrastrukturës dhe Energjisë, importuesit e mëdhenj të karburanteve paralajmërojnë se këto çmime janë nën kosto dhe rrezikojnë të shkaktojnë humbje të konsiderueshme financiare.
Për këtë arsye, ata njoftojnë se janë të detyruar të marrin masa të përkohshme, duke përfshirë pezullimin dhe kufizimin e shitjes me shumicë të naftës dhe benzinës, si dhe frenimin e procesit të zhdoganimit të karburanteve në Porto Romano deri në një moment të dytë.
Kompanitë argumentojnë se metodologjia e përllogaritjes së çmimeve është e vjetëruar dhe bazohet në formulën e vitit 2022, e cila nuk reflekton kushtet aktuale të tregut dhe kontratat që ato kanë në fuqi me furnitorët.
Të dhënat e tregut ndërkombëtar tregojnë se më 26 mars 2026, nafta u mbyll në nivelin 1,402.5 dollarë për ton, me një rritje prej 134.75 dollarë, ndërsa benzina në 1,037.25 dollarë për ton, me një rritje prej 49.25 dollarë.
Duke përfshirë premiot aktuale, kostot reale rezultojnë 206.2 lekë për litër për naftën dhe 169.7 lekë për litër për benzinën.
Sipas importuesve, çmimet e shitjes me shumicë, edhe me një marzh minimal prej 3 lekësh për litër, duhet të ishin 209.2 lekë për naftën dhe 172.7 lekë për benzinën.
Kjo krijon një diferencë të konsiderueshme me çmimet e vendosura nga Bordi, konkretisht 18.2 lekë për litër për naftën dhe 9.7 lekë për litër për benzinën.
Në këto kushte, kompanitë kërkojnë mbledhjen urgjente të Bordit të Transparencës për rishikimin e çmimeve dhe metodologjisë së përllogaritjes.
Ata propozojnë që çmimi të bazohet në kushtet CIF Med, me premium prej +50 dollarë për ton për gazoilin dhe +75 dollarë për ton për benzinën.
Gjithashtu, kërkohet rishikimi i marzheve bruto, duke propozuar që për gazoilin të jetë +3.5 lekë për litër në shumicë dhe +15 lekë në pakicë, ndërsa për benzinën +4.5 lekë për litër në shumicë dhe +16 lekë në pakicë. /skyweb.al
