Pjesë nga dosja hetimore e SPAK, e parë nga Skyweb.al tregon se në lidhje me një procedurë tenderimi për ndërtimin e një tuneli janë zbuluar komunikime të drejtpërdrejta mes zëvendëskryeministres Belinda Balluku dhe ish-drejtorit të ARRSH, Evis Berberi, përmes aplikacionit “Signal Private Messenger”.
Në datën 1 tetor 2021, në orën 10:52, Berberi i shkruan Ballukut:
“Ok. Për pak nxjerr tunelin.”
Në orën 10:53, Balluku i përgjigjet:
“Prit dhe pak.”
Pak sekonda më vonë, Berberi pyet:
“Për tunel ok?”
Në orën 10:54, Balluku i kthen:
“Po po, prit t’i çoj fjalën atij kurvës që kërcënon me sms.”
Në orën 13:37, Balluku shkruan:
“Nxirre tunelin.”
Në orën 13:43, Berberi:
“Ok. Për pak.”
Në orën 16:06, Berberi njofton:
“Tuneli u nxorr sapo.”
Sipas të dhënave të sistemit elektronik të prokurimit publik, Komisioni i Vlerësimit të Ofertave përfundoi procesin në orën 16:07 të po asaj dite, duke përputhur minutë për minutë mesazhet me momentin e mbylljes së tenderit.
Në dosje përfshihet edhe një komunikim tjetër në aplikacionin “WhatsApp”, mes punonjëseve të ARRSH, Valbona Pepa dhe Jetmira Dervishi, të sekuestruar nga aparati “Samsung Galaxy A04S”.
Në orën 16:13, Pepa pyet:
“Shoqe, kush fitoi?”
Jetmira Dervishi i përgjigjet:
“U shpall fituesi turku me gjokën.”
Pas një shkëmbimi mesazhesh mes tyre, Pepa shprehet:
“Ku je ti që do i skualifikosh kur them unë.”
Ndërsa Dervishi i përgjigjet:
“U argumentua në grup, e meritonte.”
Komunikimet e zbuluara në dosje përkojnë me kohën e mbylljes së procesit të vlerësimit, duke ngritur dyshime për ndikim të drejtpërdrejtë në rezultatin e tenderit.
