Autoriteti i Komunikimeve Elektronike dhe Postare (AKEP) ka nxjerrë për konsultim publik një rregullore të re që synon forcimin e sigurisë së rrjeteve dhe mbrojtjen e të dhënave të përdoruesve nga sulmet kibernetike dhe problemet teknike.
Dokumenti vendos standarde të detyrueshme për të gjitha kompanitë që ofrojnë shërbime telefonie dhe interneti për publikun, duke synuar të parandalojë ndërprerjet e shërbimeve dhe cenimin e të dhënave personale.
Sipas rregullores, operatorët janë të detyruar të marrin masa teknike dhe organizative për të shmangur sulmet, defektet dhe çdo incident që mund të ndikojë te përdoruesit. Ata duhet të kenë plane sigurie të detajuara, të trajnojnë stafin dhe të kontrollojnë rregullisht sistemet e tyre.
Në rast incidenti, kompanitë janë të detyruara të njoftojnë AKEP-in brenda 24 orëve, si dhe të informojnë përdoruesitnëse ekziston rrezik për cenimin e të dhënave personale. Rregullorja përcakton formatin e raportimit dhe vlerësimin e ndikimit sipas një tabele që kategorizon incidentet si me ndikim të ulët, mesatar apo të lartë.
Operatorët me të ardhura mbi 100 milionë lekë në vit mund të detyrohen të kryejnë auditime të pavarura sigurie, ndërsa në rast mangësish, AKEP mund të vendosë masa të detyrueshme për përmirësim me afate konkrete zbatimi.
Rregullorja përfshin gjithashtu detyrimin për publikimin e udhëzimeve për përdoruesit, caktimin e një personi përgjegjës për sigurinë, dhe mbajtjen e regjistrit të incidenteve.
Në rast se kompanitë nuk respektojnë rregullat, AKEP do të ketë të drejtë të vendosë gjobat dhe masat administrative përkatëse, sipas ligjit për komunikimet elektronike. /skyweb.al
