Gazeta turke Sozcu i ka kushtuar një artikull të gjatë aferës së tunelit të Llogarasë, duke e përshkruar si një “kaos politik” që ka tronditur Shqipërinë pas hetimeve të SPAK ndaj zv.kryeministres dhe ministres së Infrastrukturës, Belinda Balluku, dhe pesë zyrtarëve të tjerë të institucioneve nën varësinë e saj.
Sipas Sozcu, kompania turke “Intekar Yapi & ASL” fitoi në vitin 2020 tenderin për ndërtimin e tunelit të Llogarasë për 172 milionë euro, por pa kryer asnjë punë vetë, ia kaloi kontratën kompanisë shqiptare “Gjoka Konstruksion” për vetëm 140 milionë euro.
Diferenca prej 32 milionë eurosh, sipas gazetës, është përfituar nga kompania turke “pa ngulur asnjë gozhdë”.
Artikulli thekson se kjo marrëveshje ka shkaktuar polemika të forta dhe një hetim penal nga SPAK, pasi opozita shqiptare ka paditur ministren Balluku për shpërdorim detyre dhe shkelje të ligjit të prokurimeve publike.
Sipas medias turke, tenderi për tunelin e Llogarasë, 20 kilometra larg Vlorës, ishte zhvilluar fillimisht në dhjetor 2020, ku fituese u shpall “Gjoka Konstruksion” me ofertë 140 milionë euro.
Por pas anulimit të papritur të garës, tenderi u rihap gjashtë muaj më vonë dhe fituan kompanitë turke “Intekar Yapi & ASL” me ofertë 172 milionë euro.
Pas nënshkrimit të kontratës, kompanitë turke nuk ndërtuan asgjë, por ia deleguan gjithë punën “Gjoka Konstruksion”-it, duke mbajtur për vete diferencën prej 32 milionë eurosh.
“Fakti që kompanitë turke gjeneruan 32 milionë euro të ardhura pa bërë asgjë ka shkaktuar kaos në Shqipëri,” shkruan Sozcu, duke shtuar se ngjarja ka hapur një tjetër krizë politike në Tiranë, ku vihen në pikëpyetje procedurat e tenderimit dhe marrëdhëniet e qeverisë me bizneset e huaja. /skyweb.al
