Drejtuesit e grupeve parlamentare të CDU/CSU dhe SPD kanë arritur një marrëveshje bazë se si mund të organizohet shërbimi ushtarak i ardhshëm në Gjermani, njoftoi televizioni ARD në Berlin.
Kjo marrëveshje u arrit pas konsultimeve midis ministrit të Mbrojtjes, Boris Pistorius nga SPD, dhe përfaqësuesve të koalicionit qeverisës. Në diskutime morën pjesë kreu i grupit parlamentar të CDU/CSU-së, Jens Spahn, dhe kreu i grupit të SPD-së, Matthias Miersch, së bashku me ekspertë të mbrojtjes nga të dy partitë.
Sipas mediave gjermane, një pjesë e modelit të propozuar përfshin kontrollin mjekësor të të rinjve në një grupmoshe çdo vit, dhe ky kontroll do të jetë i detyrueshëm. Nëse nuk gjenden mjaft vullnetarë për t’iu bashkuar trupave ushtarake, do të aplikohet një sistem llotarie për të përcaktuar se kush duhet të shërbejë.
Plani parashikon që, si përgjigje ndaj rritjes së kërcënimeve dhe ndryshimeve në politikat e NATO-s, forcat e armatosura gjermane të zmadhohen deri në rreth 260 000 anëtarë të rregullt dhe 200 000 rezervistë. /Skyweb.al
