Në një ditë të ftohtë, por me diell, të datës 2 shkurt 2022, Gledis Çela, 39-vjeçar nga Vlora, autorizoi juristen Meriza B. që të vepronte në emër të tij për të regjistruar kompaninë “G&E Investment” sh.p.k.
Vetëm pak ditë më vonë, më 10 shkurt, kompania do të merrte NIPT-in M21410045I në Qendrën Kombëtare të Biznesit.
Për gati tre vjet, kjo shoqëri, me pronarë Gledis Çelën dhe Endrit Shabanin, që zotërojnë nga 50% të aksioneve me një kapital prej vetëm 100 mijë lekësh, do të mbetej pa ndonjë aktivitet të qenësishëm.
Bilancet e kompanisë, të konsultuara nga Skyweb.al tregojnë se “G&E Investment” nuk ka ndonjë aktivitet për t’u shënuar. Madje, thuajse nuk ka fare.
Megjithatë, në vitin 2025 situata ndryshoi rrënjësisht.
Kompania mori leje ndërtimi nga Agjencia e Zhvillimit të Territorit (AZHT) për të paktën dy kulla shumëkatëshe, duke kaluar nga statusi i një subjekti tejet modest në një nga emrat më aktivë në sektorin e ndërtimit.
Projekti i parë u miratua në gusht 2025 për ndërtimin e një kulle 39-katëshe me katër kate nëntokë në zonën e Ujit të Ftohtë në Vlorë, një prej zonave më të kërkuara të vendit. Bëhet fjalë për kullën “The Metropolitan”.
Pavarësisht kapitalit minimal dhe bilancit zero, AZHT i dha kompanisë lejen për një ndër projektet më ambicioze të dekadës.
Vetëm pak javë më vonë, e njëjta kompani mori një tjetër leje për ndërtimin e një kulle në Tiranë. Bëhet fjalë për projektin “Godinë multifunksionale ‘One Boulevard Tower’”, me vendndodhje në Bulevardin e Ri, në pjesën më të lakmuar nga ndërtuesit.
Leja u miratua në mes të verës nga AZHT, në një periudhë kur pjesa më e madhe e qytetarëve ishin me pushime.
Sipas të dhënave të siguruara nga Skyweb.al, edhe ky projekt parashikon një kullë 39-katëshe, me volum dhe dimensione më të mëdha krahasuar me atë të Vlorës.
Dokumentet zyrtare të QKB tregojnë se kompania “G&E Investment” ka dorëzuar bilance zero për vitet 2022 dhe 2023, ndërsa për 2024 ende nuk ka raportuar asnjë aktivitet financiar, ndonëse afati ligjor për dorëzimin e bilancit ka përfunduar më 31 korrik 2025.
Në një kohë kur ndërtimi është kthyer në sektorin kryesor të ekonomisë shqiptare dhe taksat për këtë aktivitet janë rritur ndjeshëm, mungesa e transparencës mbi kapacitetet financiare të kompanive ndërtuese ngre pikëpyetje të forta duke vënë në dyshim edhe shëndetin e sektorit.
“G&E Investment” sh.p.k., përveç dy kullave në Tiranë dhe Vlorë, ka deklaruar si projekte të saj edhe dy fshatra turistikë në Palasë dhe Borsh, që kërkojnë investime të mëdha dhe burime të sigurta financiare.
Ndërtimi në Shqipëri, përfshirë edhe taksat, është bërë shumë i kushtueshëm, ndërkohë që ky sektor është ai që mban në këmbë ekonominë e vendit, prandaj do të ishte me shumë interes informacioni mbi kapacitetet financiare të kompanive që marrin leje për kulla në mes të kryeqytetit të Shqipërisë.
Kjo vlen edhe për “G&E Investment” sh.p.k., e cila krahas kullave në Vlorë dhe Tiranë, deklaron si projekte të saj edhe dy fshatra turistike në Palasë dhe Borsh, të cilat po ashtu kërkojnë kapitale të mëdha për t’u ndërtuar.
Në çdo raport vjetor, Departamenti i Shtetit ka informuar për fenomenin e pastrimit masiv të parave, sidomos në sektorin e ndërtimit në vend, prandaj transparenca do të ishte e shëndetshme për këtë sektor, duke ditur ndërkohë që edhe Banka e Shqipërisë ka dhënë sinjale të forta për këtë sektor që po “ftohet”. /skyweb.al
Ky është një artikull ekskluziv i Skyweb.al. Çdo referim apo ripublikim i tij duhet të bëhet duke cituar burimin me link!
