Greqia ka testuar një sërë dronësh të prodhuar në vend si edhe sisteme kundër dronëve gjatë një stërvitjeje të madhe ushtarake të zhvilluar pranë Aleksandropolis, në verilindje të vendit.
Oficerë nga disa shtete të NATO-s ndoqën nga afër manovrat, ku morën pjesë helikopterë, trupa këmbësorie dhe një gamë e gjerë dronësh të koordinuar në një skenar të simuluar beteje me intensitet të lartë. Ministri i Mbrojtjes, Nikos Dendias, deklaroi se ushtrimi përfaqëson një fazë të re për teknologjinë pa pilot të prodhuar në Greqi, ndërsa vendi synon të rrisë kapacitetet vendase dhe të reduktojë varësinë nga furnizuesit e huaj.
“Vendi ynë, Forcat e Armatosura, kanë hyrë në një epokë të re dhe po ecin me besim e stabilitet për t’i garantuar shoqërisë greke dhe popullit tonë ndjenjën e sigurisë. Në Traki, pranë Aleksandropolis dhe Evros, kjo është veçanërisht e rëndësishme,” u shpreh Dendias pas përfundimit të stërvitjes.
Manovrat, të cilat u mbyllën dje, prezantuan UCAV, dronë FPV, të njëjtin lloj që është përdorur gjerësisht në fushën e betejës në Ukrainë, si edhe municione të shpenzueshme (dronë-kamikaze). Të gjitha këto sisteme janë zhvilluar për përdorim operativ dhe për stërvitje nga Forcat e Armatosura Greke. /Skyweb.al
