Shqipëria mbetet ndër vendet me përdorimin më të ulët të inteligjencës artificiale (AI), sipas të një raporti të fundit të Microsoft. Vetëm 15.8% e qytetarëve shqiptarë përdorin rregullisht mjete të AI në punë apo në jetën e përditshme, një përqindje dukshëm më e ulët krahasuar me mesataren europiane, ku shumë vende të BE-së kapërcejnë nivelin 30–40%.
Vendet më të zhvilluara të Europës po ecin me ritme shumë më të shpejta drejt adoptimit të teknologjive të reja. Norvegjia kryeson listën me 43%, ndjekur nga Irlanda me 41.7% përdorues aktivë të AI, ndërsa pas vijnë Franca me 40.9% dhe Spanja me 39.7%. Në krahun tjetër të renditjes qëndrojnë Rumania (15.3%) dhe Greqia (17.7%), të cilat, njësoj si Shqipëria, shfaqin nivele të ulëta të përdorimit të inteligjencës artificiale.
Sipas raportit që prej lançimit të ChatGPT në vitin 2022, mbi 1.2 miliardë njerëz në të gjithë botën kanë përdorur mjete të AI — një ritëm adoptimi më i shpejtë se ai i internetit, kompjuterit personal apo smartfonëve.
Microsoft nënvizon se niveli i zhvillimit ekonomik është faktor kyç në shtrirjen e inteligjencës artificiale. Vendet e Global North arrijnë një mesatare adoptimi prej rreth 23%, kundrejt vetëm 13% në Global South. Furnizimi i qëndrueshëm me energji, interneti cilësor dhe infrastruktura kompjuterike e fortë janë elementët kryesorë që mundësojnë përhapje më të shpejtë të AI.
Megjithatë, thuajse katër miliardë njerëz në botë jetojnë ende në rajone ku mungesa e infrastrukturës, e arsimit dhe e burimeve teknologjike paraqet barriera serioze. “Ky hendek nuk reflekton vetëm aksesin në mjetet e AI, por edhe pabarazi më të thella në infrastrukturë, arsim dhe gjuhë,” theksohet në raport. /Skyweb.a;
