Sot në Bruksel zhvillohet Konferenca e 7-të Ndërqeveritare Shqipëri–BE, ku pritet të hapet grupkapitulli i fundit i negociatave, “Bujqësia dhe Kohezioni”.
Ky moment shënon përmbylljen e procesit teknik të hapjes së të gjitha kapitujve negociues me Bashkimin Europian.
Delegacioni shqiptar do të kryesohet nga kryeministri Edi Rama, ndërsa në tryezë marrin pjesë komisionerja për Zgjerimin, Marta Kos, dhe ministrja daneze e Punëve të Jashtme, Marie Bjerre, vendi që mban presidencën e radhës së BE-së.
Deri më tani, Shqipëria ka hapur pesë nga gjashtë grupkapitujt e negociatave: Themeloret, Marrëdhëniet me Jashtë, Tregun e Brendshëm, Konkurrueshmërinë dhe Rritjen gjithëpërfshirëse, si edhe Axhendën e Gjelbër.
BE ka shprehur optimizëm të qartë se vendi mund ta mbyllë procesin e negociatave deri në vitin 2027 dhe të synojë anëtarësimin e plotë deri në vitin 2030. Kryeministri Rama e ka shpallur integrimin europian si prioritet absolut të mandatit të tij të katërt.
Një proces i përshpejtuar që nga viti 2022
Procesi negociues ka ecur me ritme të larta që prej 19 korrikut 2022, kur Shqipëria u ul në konferencën e parë ndërqeveritare. Më pas:
- 15 tetor 2024 (Luksemburg, presidenca hungareze): U hap kapitulli i parë, “Themeloret”.
- 17 dhjetor 2024: U nisën bisedimet për kapitullin e dytë, “Marrëdhëniet me Jashtë”.
- Prill 2025: U çel kapitulli “Tregu i Brendshëm”.
- Maj 2025: U hap “Konkurrueshmëria dhe Rritja gjithëpërfshirëse”.
- 15 shtator 2025: U hap kapitulli i pestë, “Axhenda e Gjelbër”.
Konferenca e sotme është e fundit në ciklin e hapjes së të gjashtë kapitujve dhe është kyçe për mbylljen e procesit teknik deri në 2027.
Pas kësaj, Shqipëria do të hyjë në fazën politike të integrimit, ku miratimi i anëtarësimit duhet të kalojë nga parlamentet e të 27 shteteve anëtare të BE-së. /skyweb.al
