Fondi Monetar Ndërkombëtar paralajmëron se, pavarësisht ritmeve të larta të rritjes, ekonomia shqiptare mbetet e ekspozuar ndaj rreziqeve të mëdha strukturore. Rritja është ende e varur nga turizmi, ndërsa tkurrja e popullsisë në moshë pune, mungesa e fuqisë punëtore dhe presionet mbi shpenzimet publike po e bëjnë më të brishtë perspektivën ekonomike. FMN thekson se kostot për pensione, shëndetësi dhe angazhimet në kuadër të NATO-s do të rriten ndjeshëm, duke vënë nën presion financat publike në afatin e mesëm.
Në këtë situatë, FMN e kundërshton qartë paqen fiskale të propozuar nga qeveria. Sipas Fondit, fshirja e detyrimeve, pezullimi i auditimeve dhe negociimi i fitimeve të tatueshme minojnë pajtueshmërinë tatimore, dobësojnë funksionimin e kontrollit fiskal dhe zhbëjnë përparimet e arritura në modernizimin e administratës tatimore. FMN paralajmëron se këto masa krijojnë precedent të rrezikshëm dhe dëmtojnë barazinë mes tatimpaguesve.
Fondi nënvizon gjithashtu rritjen e rrezikut nga kreditimi për pasuri të paluajtshme. Rritja e shpejtë e huadhënies në këtë sektor dhe ekspozimet e bankave kërkojnë monitorim të kujdesshëm për të shmangur rreziqet sistemike. FMN thekson se çdo lehtësim rregullator duhet të jetë i bazuar te rreziku real dhe jo të përdoret për të favorizuar projekte të caktuara.
Në analizën e saj, FMN kërkon një paketë të gjerë reformash për rritjen e produktivitetit dhe uljen e informalitetit, përfshirë përmirësimin e klimës së biznesit, investime në arsim, aftësim profesional dhe teknologji. FMN e sheh forcimin e qeverisjes dhe luftën kundër korrupsionit si elementë kyç, duke nënvizuar se ruajtja e pavarësisë së SPAK mbetet thelbësore për besueshmërinë e institucioneve.
FMN vlerëson se Shqipëria është në një fazë vendimtare të procesit të integrimit europian. Megjithë rritjen e lartë dhe stabilitetin monetar, paqëndrueshmëria globale dhe presionet e brendshme kërkojnë politika të kujdesshme dhe afatgjata. Në këtë kuadër, paqja fiskale konsiderohet një hap i gabuar që rrit rreziqet dhe ul disiplinën fiskale, në një moment kur vendi ka nevojë për reforma të qëndrueshme, jo përjashtime fiskale./skyweb.al
