Në dëgjesën në Komisionin e Ekonomisë, Dhoma e Tregtisë dhe Industrisë së Tiranës kërkoi që TVSH-ja për shportën ushqimore të ulet në nivelin 5–7%, duke argumentuar se kjo normë është më e lartë se vendet e rajonit dhe po rëndon konsumatorët në një periudhë me kosto të larta jetese.
Kreu i Dhomës, Nikolin Jaka, tha se ulja e TVSH-së do të krijonte lehtësime për familjet dhe do të sillte më shumë konkurrencë në treg, duke shtuar se ky është standard i vendeve fqinje dhe një prej mekanizmave më të përdorur në BE për produkte ushqimore.
Megjithatë, mbetet e hapur pyetja nëse një ulje e tillë fiskale do të përkthehej automatikisht në çmime më të ulëta për konsumatorët. Përvoja e viteve të fundit ka treguar se jo gjithmonë lehtësitë tatimore reflektohen në raftet e supermarketeve, sidomos në tregjet me strukturë jo plotësisht konkurruese.
Jaka kërkoi që qeveria të shoqërojë çdo ndryshim me mekanizma monitorimi, për të siguruar që përfitimet të mos përthithen vetëm nga zinxhiri i përpunimit dhe shitjes, por të shkojnë realisht te qytetarët. Ai propozoi gjithashtu përjashtimin nga tarifat doganore të lëndëve të para të agropërpunimit dhe subvencion direkt për çdo litër qumësht të prodhuar nga fermerët.
Ndërkohë debati mbi uljen e TVSH-së dhe efektet e saj pritet të vijojë, pasi biznesi dhe konsumatorët presin sinjale të qarta nëse masa të tilla do të ndikojnë realisht në uljen e kostos së jetesës. /skyweb.al
