Në dëgjesën e Komisionit për Ekonominë, Punësimin dhe Financat, gjatë diskutimeve mbi paketën fiskale, Shoqata Shqiptare e Bankave paraqiti një propozim për rishikimin e kufirit të përdorimit të parasë cash nga individët.
Projektligji i ri “Për procedurat tatimore” parashikon uljen e pragut për pagesat me para në dorë ndërmjet bizneseve nga 150 000 lekë në 100 000 lekë, si dhe vendosjen e një tavanit prej 500 000 lekësh për transaksionet cash midis individëve dhe të vetëpunësuarve apo tregtarëve.
Sekretari i Përgjithshëm i Shoqatës së Bankave, Spiro Brumbulli, kundërshtoi këtë kufi për individët, duke propozuar një tavan rreth 60 000 lekësh. Sipas tij, kufiri 500 000 lekë jo vetëm që është i pajustifikuar, por edhe rrezikon të nxisë përdorimin e mëtejshëm të parasë fizike.
“Ky është takimi ynë i parë ku po shprehemi, pasi deri më sot nuk kemi pasur kontakt të mëparshëm për mendimet dhe komentet tona. Ne vlerësojmë hapat e ndërmarrë për uljen e përdorimit të cash-it dhe në këto ndryshime është përcaktuar edhe domosdoshmëria e vendosjes së tavanit për veprimet në cash.
Dua të theksoj dy momente:
Vendosja e kanaleve alternative të pagesës është një gjë pozitive, por kemi një merak: afati deri në fund të vitit mund të jetë i parealizueshëm. Aktualisht zgjidhja e vetme është pajisja e bizneseve me POS. Ndërkohë, në strategjinë e miratuar nga Komiteti Kombëtar i Pagesave, deri në vitin 2026 do të funksionojë pagesa e menjëhershme, një alternativë më e lehtë dhe me më pak kosto.
Shqetësimi ynë është se nëse nuk jemi gati deri në fund të vitit, çfarë zgjidhje do t’u japim bizneseve? Sepse vendosja e një zgjidhjeje të përkohshme për 4 muaj rrezikon të sjellë mosrealizim të objektivit. Ne po bëjmë përpjekje për të realizuar sa më shpejt pagesën e menjëhershme.
Edhe pse nga qeveria ka vullnet për të çuar përpara nismën “cashless”, hapat dhe masat e marra nuk shkojnë në këtë drejtim. Kemi kërkuar vendosjen e tavaneve. Deri sot kemi tavan vetëm për transaksionet biznes–biznes, por jo për individët.
Për herë të parë vendoset një tavan edhe për individët. Por trajtimi i individëve dhe bizneseve në këtë mënyrë nuk ka logjikë. Për bizneset, tavanin e keni ulur nga 150 mijë në 100 mijë lekë, ndërsa për individët është vendosur 500 mijë lekë – jashtë çdo analize, eksperience dhe praktike.
Propozimi ynë është tavan për individët rreth 60 mijë lekë, për të mos nxitur rritjen e përdorimit të cash-it. Lënia e tavanit prej 500 mijë lekësh është pa sens, nuk gjejmë asnjë argument që ta justifikojë këtë”, u shpreh ai.
