Për vite me radhë, arsimi profesional ka qenë një nga përgjigjet e kërkesës së tregut për punonjës të kualifikuar. Dhe shifrat tregojnë se zgjedhja për një profesion po fiton gradualisht më shumë peshë tek të rinjtë shqiptarë. Por duke ju referuar shifrave të vitit 2012, nxënësit e arsimit profesional përbënin vetëm 12.7% të totalit të nxënësve në gjimnaze. 13 vite më vonë, kjo peshë është rritur në 19.4%.
Pra, sot, pothuajse 1 në 5 nxënës të nivelit të mesëm ndjek arsimin profesional. Por rritja e peshës nuk do të thotë domosdoshmërisht se numri i nxënësve është rritur.
Në vitin 2012, arsimi profesional kishte 19596 nxënës. Numri u rrit me ritëm të shpejtë në dy vitet pasuese, duke arritur kulmin në vitin 2014, me 22801 nxënës. Më pas nisi një tendencë rënëse në vitin 2018, ku ishin 21287 nxënës, ndërsa në 2020 shifra zbriti në 19024. Rënia vijoi edhe pas pandemisë, ku në vitin 2022 arsimi profesional kishte 16813 nxënës, ndërsa një vit më vonë shifra preku nivelin më të ulët të periudhës, me vetëm 16407 nxënës.
Dy vitet e fundit sjellin një përmirësim të lehtë. Në vitin 2024 numri u rrit në 16987, ndërsa në 2025 arriti në 17190 nxënës. Por, krahasuar me pikun e vitit 2014, janë ende rreth 5600 nxënës më pak. Kontrasti bëhet edhe më i dukshëm kur shihet pesha e arsimit profesional në total. Nga 12.7% në vitin 2012, ajo është rritur në 15% në 2013, 16.3% në 2014 dhe vijon gradualisht lart, duke arritur 18.2% në 2018.
Pas një periudhe stabilizimi rreth 17–18%, pesha nis të rritet sërish dhe në vitin 2025 arrin nivelin rekord prej 19.4%. Pra, arsimi profesional po zë një hapësirë më të madhe në sistem, edhe pse numri i përgjithshëm i nxënësve të tij nuk është kthyer në nivelet e një dekade më parë./scan.tv
