Pjesë të mëdha të Evropës po humbin me shpejtësi rezervat e ujit të ëmbël, sipas një analize të gjerë të të dhënave satelitore të mbledhura gjatë më shumë se 20 viteve.
Studiues nga University College London, në bashkëpunim me Watershed Investigations dhe The Guardian, kanë zbuluar se sasitë totale të ujit kanë rënë ndjeshëm në Evropën jugore dhe qendrore, nga Spanja, Italia deri në Poloni e në disa zona të Mbretërisë së Bashkuar.
Përdorimi i satelitëve që matin ndryshimet në fushën gravitacionale të Tokës u ka lejuar shkencëtarëve të “peshojnë” ujërat nëntokësore, liqenet, lumenjtë, lagështinë e tokës dhe akullnajat. Rezultatet paraqesin një kontinent gjithnjë e më të polarizuar: rajonet veriore e veriperëndimore, si Skandinavia dhe disa zona të Britanisë dhe Portugalisë, po bëhen më të lagështa, ndërsa pjesa më e madhe e jugut e juglindjes po përjeton tharje të fortë.
Sipas ekspertëve, ndikimi i ndryshimeve klimatike është i dukshëm. Mohammad Shamsudduha, profesor në UCL, thekson se të dhënat e ujit tokësor përputhen gjerësisht me trendet klimatike. Edhe uji nëntokësor, i konsideruar zakonisht më i qëndrueshëm është në rënie.
Mbretëria e Bashkuar pasqyron këtë prirje kontinentale: perëndimi po lagështohet, ndërsa lindja po thahet. Në juglindje të Anglisë, ku 70% e ujit të pijshëm vjen nga nëntoka, ndryshimet në reshje dhe periudhat më të gjata të thatësirës mund të shkaktojnë probleme të mëdha.
Në nivel të BE-së, shfrytëzimi i ujit nëntokësor është rritur me 6% që nga viti 2000, pavarësisht uljes së përgjithshme të konsumit të ujit. Komisioni Evropian thotë se strategjia për qëndrueshmërinë e ujit synon t’i ndihmojë vendet të përshtaten, ndërsa humbjet në rrjetet e furnizimit variojnë nga 8% deri në 57%.
Hidrologët paralajmërojnë se reagimi i Evropës nuk po ecën me ritmin që duhet. Hannah Cloke nga Universiteti i Reading-ut thekson se pa reshjet e nevojshme në pranverë dhe verë, Anglia mund të përballet me pasoja serioze. Ajo shton se ndërtimi i rezervuarëve të rinj nuk është zgjidhja e vetme dhe masat aktuale nuk po ecin mjaftueshëm shpejt.
Shamsudduha paralajmëron se kontinentit i duhet të përgatitet për një klimë gjithnjë e më të thatë, me pasoja për bujqësinë, ekosistemet dhe madje edhe për sigurinë ushqimore. “Duhet të pranojmë se ndryshimet klimatike janë reale, po ndodhin dhe po na prekin”, thekson ai. /Skyweb.al
