Drejtoria e Përgjithshme e Tatimeve ka vendosur një dysheme pagash për sektorin e ndërtimit, duke përcaktuar se asnjë punonjës nuk mund të paguhet nën 80 mijë lekë të rinj. Administrata u bën thirrje subjekteve të deklarojnë pagat realisht dhe korrektësisht, në mënyrë që të shmangin kontrollet e thelluara dhe masat administrative.
Sipas njoftimit, apeli i drejtohet të gjithë bizneseve dhe ndërtuesve, duke pasur parasysh nivelin e lartë të informalitetit në deklarimin e pagave. Nga dhjetori 2025, fokusi i Tatimeve do të jetë sektori i ndërtimit, me prioritet:
• Subjektet që deklarojnë paga më të ulëta se pagat indikative të publikuara
• Subjektet që ndryshojnë profesionet e punonjësve për të ulur artificialisht pagën
Lista e pagave indikative nis me sanitarët, me 600 mijë lekë të vjetra në muaj, ndërsa më pas renditen bojaxhinjtë dhe pllakaxhinjtë me 850 mijë dhe 900 mijë lekë. Pagat më të larta në sektor i takojnë arkitektëve dhe menaxherëve.
Tatimet paralajmërojnë se çdo punëdhënës që deklaron paga nën nivelin indikativ, ose ndryshon profesionin e punonjësit për të rënë në një pagë më të ulët, do të konsiderohet me risk dhe do t’i nënshtrohet kontrollit nga strukturat e specializuara.
Administrata thekson se analiza e riskut do të bazohet te krahasimi me pagat orientuese të profesioneve në ndërtim, me objektivin për të rritur kontributet e sigurimeve shoqërore dhe, në vijim, nivelin e pensioneve. /skyweb.al
