Një vezë e rrallë Fabergé prej kristali dhe diamanti, e krijuar për familjen perandorake ruse para revolucionit të vitit 1917, pritet të dalë në ankand me një vlerësim mbi 26 milionë dollarë.
Sipas shtëpisë së ankandeve Christie’s, Veza e Dimrit është një nga shtatë vezët më të çmuara Fabergé që ndodhen ende në duart e koleksionistëve privatë. Ankandi do të mbahet të martën në Londër. Objekti i rrallë, rreth 10 centimetra i lartë, është punuar nga kristal i gdhendur hollë dhe i dekoruar me motive platin të ngjashme me flokët e dëborës, si dhe me rreth 4,500 diamantë të vegjël. Në brendësi të saj ndodhet një shportë e vogël me lule prej kuarci që simbolizojnë ardhjen e pranverës.
Margo Oganesian nga Christie’s e ka cilësuar Vezen e Dimrit si një vepër të jashtëzakonshme arti, madje “Mona Lizën e artit dekorativ”.
Veza është njëra nga dy krijimet e Alma Phil, realizuar me porosi të carit Nikolas II si dhuratë Pashkësh për nënën e tij, Maria Feodorovna, në vitin 1913. Veza tjetër e Phil ndodhet në koleksionin e familjes mbretërore britanike. Në total, Peter Carl Fabergé dhe kompania e tij prodhuan më shumë se 50 vezë për familjen perandorake ruse nga viti 1885 deri më 1917, secila unike dhe me një surprizë të fshehur brenda. Tradita nisi me carin Aleksandri III, i cili i dhuronte çdo Pashkë një vezë bashkëshortes së tij, dhe vazhdoi me Nikolasin II, që ua dhuronte nënës dhe gruas.
Familja Romanov sundoi Rusinë për tre shekuj, derisa u rrëzua nga revolucioni i vitit 1917. Cara Nikolas II dhe familja e tij u ekzekutuan një vit më vonë.
Pas revolucionit, Veza e Dimrit u ble për vetëm 450 paund nga një qytetar londinez në vitet 1920 dhe për shumë vite kaloi nga një koleksionist te tjetri. Gati për dy dekada ajo konsiderohej e humbur, derisa u rishfaq në vitin 1994 dhe u shit për 7 milionë franga zvicerane. Në vitin 2002 u rivlerësua dhe u shit sërish, këtë herë për 9.6 milionë dollarë.
Tani, ekspertët e ankandeve parashikojnë se ajo mund të kapërcejë rekordin prej 18.5 milionë dollarësh, të vendosur në vitin 2017 nga shitja e një vezë tjetër Fabergé të krijuar për familjen Rothschild.
Nga rreth 50 vezët perandorake Fabergé, besohet se 43 kanë mbijetuar dhe shumica ndodhen sot në muze. /Skyweb.al
