Sipas të dhënave më të fundit të Guttmacher Institute, Shqipëria renditet ndër vendet me normën më të ulët të abortit në botë, me vetëm 1.2 raste për 1,000 gra. Me këtë rezultat, vendi pozicionohet i dyti në nivel global, menjëherë pas Algjerisë, e cila kryeson listën me 0.4 raste për 1,000 gra.
Krahasimi ndërkombëtar tregon se Shqipëria qëndron ndjeshëm përpara shumë vendeve evropiane dhe botërore, një tregues që lidhet me kombinimin e faktorëve socialë, kulturorë dhe politikave në fushën e shëndetit riprodhues.
Raporti thekson se shkalla e shtatzënive të padëshiruara në Shqipëri u ul me 86% në periudhën 1990–1994 krahasuar me vitet 2015–2019, ndërsa norma e aborteve ra me 88%. Po ashtu, përqindja e shtatzënive të padëshiruara që përfunduan me abort zbriti nga 68% në 59%.
Në rajon, shifrat janë dukshëm më të larta: Turqia dhe Kroacia raportojnë nga 2.7 raste për 1,000 gra, ndërsa Lituania 4.3 dhe Sllovakia 4.4. Serbia (4.8) dhe Italia (4.9) po ashtu qëndrojnë mbi mesataren shqiptare.
Edhe vendet e Evropës Perëndimore shënojnë norma më të larta: Gjermania 5.4, Portugalia 5.6, ndërsa Spanja dhe Holanda arrijnë në 7–7.5 raste për 1,000 gra. Jashtë kontinentit, norma mbetet e moderuar në Singapor (5) dhe Japoni (5.1), por sërish dukshëm më e lartë se ajo e Shqipërisë.
Nga ana tjetër, disa vende të botës regjistrojnë nivele tejet të larta. Groenlanda kryeson me 84.7 raste, e ndjekur nga Vietnami me 64. Në Amerikën Latine, Kuba ka 55, Argjentina 33, Brazili 32, dhe Meksika 31. Në Afrikë, Nigeria dhe Afrika e Jugut raportojnë 30–33 raste, ndërsa në Azinë Jugore India ka 48 dhe Pakistani 43.
Edhe vendet e zhvilluara paraqesin norma dukshëm më të larta se Shqipëria: SHBA (14.4), Franca (15.7), Australia (16) dhe Mbretëria e Bashkuar (20.6). Në Azi, Koreja e Jugut arrin 21 raste, ndërsa Indonezia 25. Në vende si Peruja dhe Kenia, normat shkojnë deri në 42–43 raste për 1,000 gra.
Sipas ekspertëve të shëndetit publik, norma të ulëta aborti lidhen shpesh me edukimin seksual efektiv, qasjen e gjerë në kontracepsion të sigurt dhe politika shtetërore që synojnë parandalimin e shtatzënive të padëshiruara. Faktorë kulturorë dhe ekonomikë po ashtu luajnë një rol të rëndësishëm në formimin e këtyre treguesve.
