Treguesi i besimit në ndërtim ka pësuar rënie në muajin nëntor, duke sinjalizuar ftohje graduale të sektorit pas disa vitesh rritjeje të fortë. Sipas vrojtimeve të Bankës së Shqipërisë, treguesi i besimit në ndërtim u ul me 3.1 pikë përqindje, megjithëse vijon të qëndrojë 14.4 pikë përqindje mbi mesataren historike.
Në këtë rënie kanë ndikuar të dy komponentët kryesorë. Si vlerësimi i bizneseve për aktivitetin ndërtues, ashtu edhe porositë aktuale rezultojnë më të dobëta se një muaj më parë.
Një sinjal tjetër i qartë ftohjeje është fakti që pritjet për çmimet në ndërtim kanë vijuar të bien edhe këtë muaj, çka tregon se vetë ndërtuesit nuk presin rritje çmimesh në vijim, por më shumë stabilizim ose presion në ulje.
Këto sinjale vijnë në një moment kur tregu i pasurive të paluajtshme duket i mbingopur me mijëra apartamente të pashitura, sidomos në Tiranë, ndërsa flukset hyrëse të parave nga jashtë pritet të zbuten në vitin 2026. Kombinimi mes ofertës së lartë, pritjeve në rënie për çmime dhe ngadalësimit të prurjeve nga emigracioni dhe investimet informale rrit gjasat për korrigjim të tregut të apartamenteve gjatë vitit të ardhshëm.
Në anën tjetër, treguesi i besimit të konsumatorit është rritur me 0.8 pikë përqindje në nëntor dhe qëndron 1.3 pikë përqindje mbi mesataren historike.
Rritja është nxitur kryesisht nga pritjet më optimiste të familjeve për gjendjen e tyre financiare dhe për situatën ekonomike në të ardhmen. Megjithatë, komponentët që lidhen me blerjet e mëdha, siç janë apartamentet, automjetet apo pajisjet e kushtueshme, nuk kanë ndryshuar krahasuar me muajin e kaluar.
Fakti që konsumatorët ndihen pak më optimistë për të ardhmen, por nuk po e kthejnë këtë në vendime për blerje të mëdha, tregon hezitim për të marrë përsipër angazhime afatgjata në një treg ku çmimet e apartamenteve janë rritur ndjeshëm vitet e fundit. Nëse kjo prirje vazhdon, sektori i ndërtimit rrezikon të përballet në 2026 me kombinimin më problematik për zhvilluesit. Mbingopje të tregut, ulje të porosive dhe rënie të interesit real për blerje.
Vrojtime të tilla nga Banka e Shqipërisë sinjalizojnë se cikli i artë i ndërtimit mund të jetë drejt fundit për këtë dekadë.
Prandaj pritjet për një rënie graduale të çmimeve të apartamenteve gjatë vitit 2026 po bëhen gjithnjë e më të besueshme, ndërsa tregu hyn në një fazë korrigjimi pas viteve të rritjes së shpejtë të çmimeve dhe investimeve masive në kulla dhe komplekse rezidenciale. /skyweb.al
