Këshilli i Lartë i Prokurorisë ka zgjedhur sot Klodjan Brahon në krye të Strukturës së Posaçme kundër Korrupsionit dhe Krimit të Organizuar, duke i dhënë 7 vota pro kandidaturës së tij. Vendimi erdhi pas prezantimit të platformës dhe një seance pyetjesh nga anëtarët e KLP.
Braho theksoi më herët se pika e tij më e fortë mbetet eksperienca e gjatë në hetimin e veprave penale të korrupsionit. Ai kujtoi se që prej vitit 2012 është marrë kryesisht me këtë fushë, duke nënvizuar qartësinë procedurale dhe maturinë që, sipas tij, e kanë shoqëruar në hetimet më të ndjeshme.
Braho pranoi se komunikimi publik mbetet një sfidë për prokurorët dhe për institucionin, duke theksuar se Prokuroria ndër vite nuk ka qenë e ekspozuar ndaj këtij niveli të vëmendjes mediatike. Ai u zotua se si drejtues i SPAK do t’i kushtojë rëndësi mënyrës së komunikimit me publikun dhe median, një aspekt që e konsideroi të domosdoshëm për rritjen e transparencës.
Në platformën e tij, Braho propozoi ngritjen e një sektori të posaçëm për analizën e informacionit, duke argumentuar se volumi i lartë i çështjeve kërkon një strukturë të dedikuar për përpunimin dhe menaxhimin më efikas të të dhënave që vijnë nga hetimet.
Me zgjedhjen e sotme, KLP i besoi Brahos drejtimin e një prej institucioneve më të rëndësishme në luftën kundër korrupsionit dhe krimit të organizuar në vend, në një periudhë me ngarkesë të lartë çështjesh dhe pritshmëri të forta publike. /skyweb.al
