Të dhënat zyrtare për periudhën Janar–Nëntor tregojnë se qytetarët po orientohen drejt një game më të gjerë markash dhe prodhuesish ndërkombëtarë, duke reflektuar ndryshime në preferenca, ofertën e tregut dhe kërkesën për teknologji më të avancuar.
Sipas shifrave të Drejtorisë së Përgjithshme të Shërbimeve të Transportit Rrugor, vendet me peshën më të madhe në regjistrimet e reja janë:
Republika e Koresë – 21.4 për qind, që vijon të kryesojë falë markave me eficiencë të lartë dhe çmimeve konkurruese.
Gjermania – 15.6 për qind, duke mbajtur pozicion të fortë me prodhimet e saj tradicionale premium.
Italia – 15.4 për qind, një treg gjithmonë i pranishëm për shkak të afërsisë dhe larmisë së modeleve.
Kina – 9.1 për qind, që po rrit ndjeshëm prezencën me automjete elektrike dhe marka të reja.
Zvicra – 8.4 për qind, kryesisht me mjete të përdorura të standardeve të larta.
Shtetet e Bashkuara të Amerikës – 8 për qind, që mbeten burim i qëndrueshëm për SUV-e dhe makina me motor të fuqishëm.
Diversifikimi i tregut vlerësohet si tregues i rëndësishëm i zhvillimit të sektorit dhe i rritjes së aksesit të qytetarëve në alternativa më të shumta për buxhetet dhe nevojat e tyre. Rritja e pjesës së mjeteve nga tregje aziatike dhe amerikane vjen paralelisht me kërkesën për teknologji të reja, konsum më të ulët dhe kosto mirëmbajtjeje më të përballueshme.
Autoritetet e transportit theksojnë se trendi i këtij viti pasqyron ndryshime të qarta në sjelljen e konsumatorit dhe në strukturën e tregut, i cili po zhvillohet drejt standardeve më bashkëkohore të automotorizimit. /skyweb.al
