Administrata e presidentit amerikan Donald Trump ka njoftuar programin e ri të quajtur “Karta e Artë Trump”, i cili u jep të huajve të pasur të drejtën e qëndrimit në Shtetet e Bashkuara në këmbim të një pagese prej një milioni dollarësh.
Trump e kishte prezantuar idenë disa muaj më parë, ndërsa tani ajo paraqitet nga administrata e tij si një mënyrë për të tërhequr punëtorë të kualifikuar dhe të verifikuar paraprakisht për tregun amerikan të punës. Presidenti ka deklaruar se programi do të sjellë të ardhura të mëdha për buxhetin federal.
Sipas të dhënave të mëhershme të Departamentit të Tregtisë, “Karta e Artë” pritet të gjenerojë mbi 100 miliardë dollarë, ndërsa një version edhe më i kushtueshëm, “Karta Platinum”, mund të sigurojë deri në një trilion dollarë. Megjithatë, nuk është bërë e qartë se për çfarë periudhe kohore mund të mblidhen këto shuma.
Karta me ngjyrë ari përmban një imazh të presidentit përkrah Statujës së Lirisë. Faqja zyrtare e aplikimit përmend edhe një listë pritjeje për “Kartën Trump Platinum”. Aplikantët që paguajnë 5 milionë dollarë do të mund të qëndrojnë deri në 270 ditë në vit në SHBA, pa qenë të detyruar të paguajnë taksa amerikane për të ardhurat e tyre jashtë vendit.
Për një tarifë prej 2 milionë dollarësh, kompanitë mund të blejnë një leje qëndrimi për një punonjës të tyre “në kohë rekord”, me kusht që më pas individi të kalojë një kontroll sigurie.
Sipas qeverisë, mbajtësit e këtyre kartave mund të bëhen të kualifikuar për shtetësi pas disa vitesh. /Skyweb.al
