Janë miratuar zyrtarisht procedurat për vlerësimin dhe kompensimin e dëmeve të shkaktuara nga zjarret në territorin e vendit. Lajmi u bë i ditur nga ministri i Mbrojtjes, Pirro Vengu, përmes një postimi në rrjetet sociale, ku sqaroi se çdo bashki e prekur do të zbatojë një procedurë të veçantë për evidentimin, vlerësimin dhe, në fund, kompensimin e dëmeve.
Procesi nis me ngritjen e një Grupi të Konstatimit nga kryetari i bashkisë, i cili kryen inventarizimin e dëmeve në banesa, infrastrukturë, biznese, kultura bujqësore, mjete mekanike dhe objekte socio-kulturore.
Grupi plotëson formularët përkatës duke përcaktuar kostot financiare, ndërsa përbërja e tij do të përcaktohet sipas natyrës së fatkeqësisë dhe karakterit të humbjeve.
Pas inspektimeve në terren dhe mbledhjes së dokumentacionit përkatës financiar, bashkia harton listat për subjektet e dëmtuara dhe përcakton masën e kompensimit. Pagesat do të kryhen nga fondet e vetë bashkisë, përmes fondit të Mbrojtjes Civile.
Në rast se bashkia nuk ka fonde të mjaftueshme, kompensimet do të planifikohen në vitin pasardhës buxhetor. Gjithashtu, kur shpenzimet tejkalojnë 8% të buxhetit të bashkisë, kërkesat për kompensim do t’i kalojnë Agjencisë Kombëtare të Mbrojtjes Civile, e cila do të marrë përsipër mbulimin e kostove. /skyweb.al
