Më shumë se 41 mijë migrantë kanë kaluar Kanalin e La Manshit me varka të vogla gjatë këtij viti. Vetëm gjatë natës nga e premtja në të shtunë, rreth 803 persona u nisën nga Franca veriore drejt Britanisë së Madhe me 13 gomone, duke ndërmarrë një udhëtim të rrezikshëm.
Me këto kalime, numri total i migrantëve që kanë kaluar La Manshin në vitin 2025 ka arritur në 41 455. Kalimet e së shtunës përfaqësojnë shifrën më të lartë që nga 8 tetori, kur brenda një dite mbërritën 1 075 refugjatë. Po ashtu, kjo shënon një rekord ditor për muajin dhjetor, sipas të dhënave që nga viti 2018.
Dhjetori konsiderohet zakonisht një nga muajt më të qetë për këto kalime, për shkak të temperaturave të ulëta, shikueshmërisë së dobët dhe motit të paqëndrueshëm që e bën udhëtimin veçanërisht të rrezikshëm. Rekordi i mëparshëm për mbërritjet në dhjetor ishte 3 254 persona në vitin 2024, ndërsa këtë muaj deri tani kanë mbërritur rreth 2 163 migrantë.
Ndërkohë, Gjermania ka miratuar këtë javë një ligj të ri që parashikon dënime deri në 10 vjet burg për trafikantët e qenieve njerëzore që përpiqen të dërgojnë migrantë në Britaninë e Madhe. Ligji, i cili pritet të hyjë në fuqi para fundit të vitit, synon të forcojë kompetencat e autoriteteve dhe të rrisë bashkëpunimin dhe shkëmbimin e informacionit mes Gjermanisë dhe Britanisë së Madhe.
Në të njëjtën kohë, Franca ka njoftuar plane për të ndaluar anijet e vogla në det, përpara se ato të marrin migrantë që synojnë të kalojnë drejt Britanisë së Madhe. /Skyweb.al
