Një ekip paleontologësh argjentinas ka bërë një zbulim të jashtëzakonshëm gjatë një ekspedite kërkimore në provincën Río Negro, një vezë dinosauri 70 milionë vjeçare, e ruajtur në gjendje pothuajse perfekte.
“Ishte një surprizë e plotë dhe absolute,” tha për National Geographic Gonzalo Leonel Muñoz, paleontolog vertebrorësh në Muzeun Argjentinas të Shkencave Natyrore Bernardo Rivadavia. “Nuk është e pazakontë të gjesh fosile dinosaurësh, por vezët janë shumë më të rralla dhe zakonisht më të dëmtuara.”
Zbulimi ndodhi rastësisht, teksa ekipi po kryente gërmime në një zonë të njohur për pasurinë e saj fosile. Megjithëse në rajon janë gjetur më parë fragmente vezësh dinosaurësh, një ekzemplar kaq i plotë dhe i ruajtur mirë është jashtëzakonisht i rrallë.
Pamjet e ndara nga Laboratori i Anatomisë Krahasuese dhe Evolucionit të Vertebrorëve (LACEV) në Instagram tregojnë momentin e gjetjes. Në mbishkrimin e një prej videove shkruhet:
“Me shumë mundësi kjo është gjetja e parë e këtij lloji në Amerikën e Jugut. Siç mund ta shihni, fosili është mbi 70 milionë vjeç – dhe nuk ishte vetëm, sepse gjetëm edhe një fole.”
Vezë, me përmasa të ngjashme me ato të një struci, mendohet t’i përkasë gjinisë Bonapartenykus, një dinosaur teropod që ka jetuar në fund të periudhës Kretake.
Në fotot e shpërndara nga laboratori, Federico Agnolín, udhëheqës i ekipit kërkimor dhe anatomist i njohur botërisht, shihet duke mbajtur vezën në duar. Ajo është aq mirë e ruajtur, sa – siç shkruajnë vetë shkencëtarët me humor, “duket sikur është zier fort”.
