Nga Berlini, ku po merr pjesë në Global Dialogue (BGD), forumin ndërkombëtar të nivelit të lartë që zhvillohet çdo vit në kryeqytetin gjerman, kryeministri Edi Rama foli për rolin e Inteligjencës Artificiale (AI) në administratën dhe jetën parlamentare shqiptare.
Gjatë fjalës së tij, Rama iu referua në mënyrë metaforike ministres së Shtetit për Inteligjencën Artificiale, Diella, duke thënë se “ajo është shtatzënë dhe pret 83 fëmijë”, një për çdo deputet të Grupit Parlamentar të Partisë Socialiste.
Sipas Ramës, këta “fëmijë” do të jenë asistentë digjitalë të bazuar në AI, që do të ndihmojnë deputetët në punën e tyre parlamentare. “Secili prej tyre do të marrë pjesë në seancat parlamentare, do të mbajë shënime për gjithçka që ndodh dhe do të informojë deputetin për zhvillimet, reagimet apo çështjet që lidhen me të,” u shpreh kryeministri.
Ai shtoi me humor se këta asistentë virtualë do të kenë “dijen e nënës së tyre” për legjislacionin e Bashkimit Evropian dhe do të jenë gjithmonë të gatshëm të mbështesin punën e deputetëve.
“Nëse shkon për kafe dhe harron të kthehesh në sallë, asistenti yt do të të tregojë çfarë është thënë gjatë mungesës dhe nëse emri yt është përmendur, do të të sugjerojë edhe si të reagosh,” tha Rama mes të qeshurash.
Kryeministri theksoi se përdorimi i inteligjencës artificiale në proceset institucionale është pjesë e vizionit të qeverisë për modernizimin dhe dixhitalizimin e jetës parlamentare dhe administrative në Shqipëri. /Skyweb.al
