Raporti i zjarreve në pyje për vitin 2024, i publikuar nga Qendra e Përbashkët e Kërkimit e Komisionit Evropian (KE), tregon se Evropa është përballur me një sezon më të gjatë dhe më intensiv zjarresh sesa vitet e mëparshme.
Sipas raportit, zjarret e mëdha kanë qenë në rritje të vazhdueshme që nga viti 2017 dhe të dhënat e vitit 2024 e konfirmojnë këtë trend. Gjatë sezonit të kaluar u dogjën gjithsej 383,317 hektarë tokë – një shifër më e ulët se 500 mijë hektarët e vitit 2023, kryesisht për shkak të reshjeve të ndërprera gjatë pranverës dhe verës në Mesdhe. Megjithatë, sipërfaqja e djegur mbetet mbi mesataren 17-vjeçare prej 354,185 hektarësh. Në total, në vitin 2024 u regjistruan 8,343 zjarre, mbi katër herë më shumë se mesatarja afatgjatë. Bullgaria, Greqia, Italia, Portugalia dhe Spanja ishin vendet më të prekura brenda BE-së, duke përbërë së bashku 334,940 hektarë të djegur.
Edhe vendet jo-anëtare të BE-së pjesëmarrëse në Mekanizmin e Mbrojtjes Civile të BE-së (EUCPM) pësuan dëme të konsiderueshme. Shqipëria, Bosnja e Hercegovina, Maqedonia e Veriut, Turqia dhe Ukraina rezultuan ndër më të goditurat, me Ukrainën që përbënte gjysmën e sipërfaqes së djegur në këto vende, veçanërisht në zonat pranë vijës së frontit.
Të dhënat e Shërbimit Evropian të Informacionit për Zjarret në Pyje (EFFIS) tregojnë se dinamika e zjarreve në kontinent po ndryshon në mënyrë të dukshme. Informacionet paraprake për sezonin 2025 e përforcojnë këtë shqetësim: gjithçka tregon se viti 2025 pritet të jetë më i rëndi që nga fillimi i regjistrimeve të EFFIS në vitin 2006. Frekuenca dhe intensiteti i lartë i zjarreve, të shoqëruara me sezone më të gjata rreziku, po krijojnë sfida të reja për shërbimet e zjarrfikjes në të gjithë Evropën.
Për t’u përballur me këto sfida, BE ka forcuar ndjeshëm kapacitetet e saj të reagimit. Sipas mediave të huaja, është dyfishuar flota ajrore e rescEU dhe janë bashkuar burime nga 27 vendet anëtare dhe 10 vende pjesëmarrëse në UCPM. Këtyre u janë shtuar edhe katër avionë të tjerë, 26 ekipe tokësore për shuarjen e zjarreve dhe një ekip vlerësimi nga Grupi Evropian i Mbrojtjes Civile, si edhe ndihma spontane nga vendet anëtare.
KE thekson se krahas kapaciteteve të forta të ndërhyrjes, masat parandaluese mbeten thelbësore. Ndër to përfshihen zhvillimi i menaxhimit të integruar të rrezikut nga zjarret, përdorimi i zgjidhjeve të bazuara në natyrë dhe përmirësimi i menaxhimit të peizazhit për të reduktuar ndjeshmërinë ndaj zjarreve – të gjitha këto të domosdoshme për t’i bërë ballë rrezikut gjithnjë në rritje.
